🟥 भगवंताच्या काठीचा आवाज होत नाही पण मार बसतोच.., पोलीस उपनिरीक्षकांचे कर्म सहाय्यक पोलिस निरीक्षकाला भोवले

🟥 बिल्डर सिद्धांत परब प्रकरण पोलिसांनी व्यवस्थीत हाताळले असते तर ही वेळ आलीच नसती

अडकविण्याच्या प्रकारात बिल्डर सिद्धांत परब माहिर…तरीही पोलीस अधिकाऱ्यांनी लाच मागण्याची हिम्मत कशी केली

🎥 Kokan Live Breaking News

✍️ संपादकीय : सीताराम गावडे

🎴सावंतवाडी, दि-१३:- सावंतवाडी पोलीस ठाण्याचे पोलीस निरीक्षक ऋषिकेश अधिकारी यांच्याकडे काही पत्रकारांच्या साक्षीने मी तुमच्या पोलीस ठाण्यातील तुमच्या सहकाऱ्यांमुळे तुम्ही अडचणीत येणार आहात, शेवटी साम, दाम, दंड ,भेद , डोक्यावरून पाणी गेले की कोणीतरी लाच लुचपत विभागाला कळवून अशी कामे करणाऱ्या लटकवणार असे स्पष्टपणे सांगितले होते व त्याला सावंतवाडीतील दोन पत्रकार ही साक्षी होते, याला दहा ते पंधरा दिवस उलटायच्या आतच सावंतवाडीतील सहाय्यक पोलीस निरीक्षक सागर खंडागळे व उपनिरीक्षक सुरज पाटील यांच्यावर लाचलुचपत विभागामार्फत कारवाई करण्यात आली.

सागर खंडागळे याला तीन दिवसाची पोलीस कोठडी सुनावण्यात आली आहे तर सुरज पाटील रक्तदाबामुळे जिल्हा रुग्णालयात उपचार घेत आहेत. मी कालही सावंतवाडी पोलीस ठाण्यात स्पष्टपणे सांगितले हे होणारच होते, नियतीची चक्रे फिरत असतात ती कधी ना कधी उलटणारच ती चक्रे फिरली व सुक्या बरोबर ओले ही जळले, खरंतर सागर खंडागळे यांच्या कार्यपद्धतीबद्दल कोणाचाच आक्षेप नव्हता मात्र चुकीची संगत पकडली की काय होते व कोणते परिणाम भोगावे लागतात याची प्रचिती सागर खंडागळे यांना आली असेलच. काही दिवसापूर्वी निरीक्षक सागर खंडागळे यांना मी भेटलो व काही गोष्टी समजावून सांगितल्या होत्या, मात्र म्हणतात ते काही खोटे नाही पापाचे शंभर घडे भरले की त्याचा निर्णय हा होतोच त्यामुळे एकाने केलेल्या चुकीची शिक्षा दुसऱ्याला भोगायला लागली कारण त्याने चुकी करणाऱ्या माणसाला साथ दिली.

सागर खंडागळे हे यापूर्वी कणकवली पोलीस ठाण्यात कार्यरत होते. त्यांच्याबद्दल तेथील पत्रकारांनी चांगलेच सांगितले त्यामुळे एक चांगला अधिकारी या प्रकरणात भरडला गेला याचे खरे दुःख आहे. मात्र या दुःखाबरोबरच चुकीच्या गोष्टीला समर्थन दिले म्हणून ही घटना घडली हे तेवढेच सत्य आहे. सावंतवाडीतील प्रसिद्ध बिल्डर सिद्धांत परब यांनी यापूर्वी भूमि अभिलेख असू दे की अन्य खात्यातील अधिकाऱ्यांना लाचलुचपत विभागाच्या ताब्यात दिले होते ही उदाहरणे डोळ्यासमोर असताना सिद्धांत परब यांच्याकडे पैशाची मागणी करण्याचे धाडस या पोलीस खात्यातील अधिकाऱ्यांना झालेच कसे? तो रुग्णालयात उपचार घेत असताना त्याला बोलावून घेऊन मांडवली केली गेली व दुसऱ्या दिवशी रुग्णालयातून दुपारी डिस्चार्ज मिळाल्यानंतर पुढील प्रक्रिया पार पडली, वास्तविक सिद्धांत परब हा माजी सैनिक यांचा मुलगा आहे. मध्यंतरीच्या काळात कठीण परिस्थितीला सामोरे गेला ,त्यावेळी त्यांच्या हातून काही चुकाही घडल्या मात्र त्या चुकांवर बोट ठेवत एखाद्या माणसाला जाणून-बुजून टार्गेट करणे चुकीचे होते, म्हणून याविरुद्ध आम्ही लिहिलेही त्या प्रकरणाची सखोल चौकशी करावी अशी ही मागणी केली त्या चौकशीत जर सिद्धांत परब दोषी असेल तर त्याच्यावर रितसर कारवाई करावी अशी आमची मागणी होती. त्यावेळी कोणाला पाठीशी घालण्याचा विषय नव्हता मात्र काही जणांनी पराचा कावळा करून त्या बातमीलाही घेरण्याचा प्रयत्न केला,मात्र परमेश्वराच्या कृपेने सावंतवाडीतील प्रतितिथ यश वकील ॲड बापू गव्हाणकर व सर्वोच्च न्यायालयाचे वकील आमचे मित्र व कोकण लाईव्ह चे मानद संपादक विक्रम भांगले हे सोबत असल्याने आम्ही अशा कुठच्याच गोष्टींना कधीच भिक घातली नाही, जे सत्य आहे ते जनतेसमोर मांडत राहणार तेही न घाबरता हे आमचे पहिल्यापासून ते तत्त्व आहे व तत्व आम्ही जोपासणारच.

सिद्धांत परब प्रकरणात पास्ते नामक सैनिकाला चुकीच्या पद्धतीने गोवण्यात आले असा आमचा थेट आरोप होता ,खरंतर सिद्धांत परब यांनी एक फ्लॅट पास्ते नामक सैनिकाला साठे करार करून फसवले व खरी फसवणूक पास्ते नामक सैनिकाची झाली होती त्या फ्लॅटवर सिद्धांत परब यांनी कर्ज काढले व आपली फसवणूक केली अशी तक्रार अशोक पवार यांची होती त्यांची तक्रारही योग्य होती कारण ते फ्लॅट धारक आहेत मात्र पास्ते यांचा त्या प्रकरणाशी कोणताही संबंध नसताना पोलिसांनी पास्तेला या प्रकरणात का गोवले हा मोठा संशयाचा विषय आहे ,कारण पास्ते यांनी बिल्डर म्हणून सिद्धांत परब यांच्याशी व्यवहार केला होता ते अशोक पवार यांना ओळखत नव्हते किंवा तो फ्लॅट अशोक पवार यांनी घेतला हे त्यांना माहितीही नव्हते म्हणजे सिद्धांत परब ने पास्ते यांची खरी फसवणूक केली होती, साक्षीदार अमित पास्ते असायला हवे होते मात्र या ठिकाणी पास्ते यांना आरोपी करण्यात आले.. एकंदरीत हे प्रकरण संशयाच्या भोवऱ्यात असल्याने त्या प्रकरणाची सखोल चौकशीची आम्ही मागणी केली होती. जिल्हा न्यायालयात बिल्डर सिद्धांत परब यांना जामीन नाकारण्यात आला त्यांनी उच्च न्यायालयात जाऊन या प्रकरणात जामीन मिळविला, मात्र दुसरे आरोपी पास्ते ना अडचणीत आणू असे सांगून सिद्धांत परब यांच्याकडून मोठी खंडणी उकळण्याचा डाव सुरज पाटील यांचा होता यासाठी त्यांनी तपासी अंमलदार सागर खंडागळे यांना हाताशी धरले त्यांच्या भुलभुलैय्याला खंडागळे ही बळी पडले व लाचलुचपत विभागाच्या जाळ्यात अलगदपणे सापडले हे प्रकरण पारदर्शकपणे हाताळले असते तर ही वेळ आली नसती हे आम्ही या ठिकाणी ठामपणे मांडू इच्छितो.

लाच लुचपत विभागाकडे या दोन्ही पोलीस अधिकाऱ्यांविरुद्ध सर्व पुरावा आहे व त्या आधारे त्यांनी त्यांना जाळ्यात पकडले तक्रारदार सिद्धांत हा लाच देण्याच्या प्रकरणात अडकवण्यात माहीर आहे हे सर्व न्यात असताना सुद्धा पोलिसांनी केवळ लालसेपोटी हे कृत्य केले व अडचणीत आले. आमची पुन्हा एकदा मागणी आहे की सिद्धांत परब प्रकरणाची सखोल चौकशी करावी व सत्य काय आहे ते जनतेसमोर आणावे व देश सेवा करणाऱ्या पास्ते यांना या गुन्ह्यात आरोपी कसे केले याचाही खुलासा पोलीस प्रशासन करावा अशी विनंती आहे.