🛑 रत्नागिरी जिल्हा बँक निवडणूकित विद्यमान सहकार पॅनेलच्या मनमानी कारभाराविरोधात राष्ट्रवादीच्या चिपळूण तालुकाध्यक्षांचे बंड

_*🛑 चिपळूण तालुक्यात दिशाहीन उमेदवारांविरोधात महिलांची तीव्र नाराजी..*_

*🎥 कोकण लाईव्ह ब्रेकिंग न्यूज*
_अचुक बातमी थेट हल्ला_

*✍️प्रतिनिधी : ओंकार रेळेकर*

*🎴चिपळूण १८ ऑक्टोबर :-* रत्नागिरी जिल्हा मध्यवर्ती सहकारी बँक पंचवार्षिक निवडणूक १९ नोव्हेंबर २०२१ रोजी होत असून या निवडणुकीत तानाजी चोरगे यांच्या नेतृत्वाखाली सर्वपक्षीय सहकार पॅनल निवडणूक लढवत आहे.यामध्ये राष्ट्रवादी काँग्रेस जास्त सदस्य संख्या
असलेला पक्ष आहे.मात्र उमेदवार निवडताना राष्ट्रवादीचे चिपळूणचे आमदार शेखर निकम,माजी आमदार रमेशभाई कदम,अल्पसंख्याक सेलचे अध्यक्ष शौकत मुकादम यांना जरादेखील विश्वासात न घेता हे पॅनल केल्याचा खळबळजनक आरोप राष्ट्रवादीचेच चिपळूण तालुकाध्यक्ष जयंद्रथ खताते यांनी करून घरचा आहेर दिला. रविवार १७ ऑक्टोबर रोजी पत्रकार परिषदेत ते बोलत होते.यावेळी त्यांच्यासोबत राष्ट्रवादी महिला जिल्हाध्यक्षा चित्रा चव्हाण,तालुकाध्यक्षा दिपिका कोतवडेकर ,ज्येष्ठ सदस्या सीमा चाळके,अविनाश हरदारे आदी उपस्थित होते.
सदरचे पॅनलमध्ये जुनेजाणते ,शेतकी विषयातील तज्ञ उमेदवारांना डावलून जे पहिले संचालक आहेत त्यांनाच उमेदवारी देण्याचा घाट घालण्यात आला आहे.तसेच काही ठिकाणी पक्षाच्या कार्यकर्त्यांशी चर्चा न करता उमेदवार बदलले आहेत.ज्याप्रमाणे दिशा दाभोळकर ह्या जिल्हा परिषद सदस्या,वयाच्या ४२ व्या वर्षी रत्नागिरी जिल्हा महिला राष्ट्रवादी काँग्रेसच्या युवती अध्यक्षा अशी पद भूषवित आहेत.शेतकी तसेच बँक विषयी त्यांना किती ज्ञान आहे हा प्रश्न असून या विषयात परिपूर्ण ज्ञान असणाऱ्या महिलांना डावलले गेले आहे.गोखले ह्या महिला शेतकी,सहकार विषयात पारंगत असताना त्यांना बाजूला ठेवले जात आहे. जिल्हयात अनेक महिला पक्षासाठी कार्यरत असताना एकाच महिलेला एवढी पदे दिली जात असल्याने तालुक्यातुन अनेक महिला तसेच कार्यकर्त्यांनी आपल्या कडे नाराजी बोलून दाखवली. या विषयाला वाचा फोडण्यासाठीच आपण पत्रकार परिषद घेतली असून चिपळूण तालुक्या प्रमाणेच संपूर्ण जिल्ह्यात आपण पॅनल उभे करणार असल्याचे त्यांनी सांगितले.आणि तालुकाध्यक्ष म्हणून ह्या घटनेचा आपण निषेध करत असल्याचे देखील खताते यांनी यावेळी सांगितले.
येत्या काही दिवसात लोक व कार्यकर्ते यांच्या आग्रहास्तव नवीन पॅनल पूर्ण ताकतीनिशी उभे करणार असल्याचा पुनरोच्चार त्यांनी यावेळी केला.चोरगे हे शरद पवारांच्या नावाखाली पॅनल काढून आपल्या मर्जीतील लोकांची वर्णी लावून कारभार करत आहेत.त्याला वाचा फोडण्यासाठी तसेच बँकेच्या विरोधातील वातावरण असल्याने त्याला पाठबळ देण्यासाठी पूर्ण ताकतीनिशी आपण उभे ठाकणार असल्याचे देखील यावेळी सांगितले.
स्वर्गीय खासदार गोविंदराव निकम यांच्या काळात शेतकरी, बेरोजगार तसेच तरुणांना न्याय मिळत होता. मात्र सध्या त्याउलट शेतकरी, तरुणांना दुर्लक्ष करून कारखानदारांना कर्ज देण्याचा सपाटा लावला आहे.महापुराच्या नंतर शेतकरी, व्यापारी याना ५ टक्के दराने कर्ज देण्याची घोषणा केली मात्र कर्ज देताना कागदपत्रांची भली मोठी लिस्ट समोर ठेवली जाते.यामुळे ही बँक सर्वसामान्यांची आहे का ? असा प्रश्न सर्वासमान्यांना पडला आहे.राष्ट्रवादी मोठा पक्ष असून यामध्ये अनेक युवती , महिला काम करत करत असताना एकच नाव सारखे घेण्यामागे काय कारण आहे असा सवाल यावेळी उपस्थित महिलांनी केला आहे.आमदार शेखर निकम हे आमचे नेते आहेत त्यांच्याबद्दल आम्ही काही बोलू शकत नाही किंवा आमचे काही म्हणणे नाही असेदेखील यावेळी सांगण्यात आले.
यावेळी उपस्थित महिला पदाधिकाऱ्यांनी देखील दिशा दाभोळकर यांच्या निवडीबद्दल नाराजी व्यक्त करून आपण इतके वर्षे पक्षाचे काम करून सुद्धा नेहमीच डावलण्याचे कारस्थान जिल्ह्यातील काही मंडळी करत आहेत.शरद पवार हे नेहमीच महिलांना समान संधी देण्याशी सहमत असताना इथे मात्र ठराविक जणांनाच सर्व ठिकाणी संधी दिली जात आहे.मग आम्ही काय फक्त आंदोलनच करत बसायचे का ? असा सवाल चित्रा चव्हाण यांनी उपस्थित केला.यावेळी मात्र आम्ही गप्प बसणार नसल्याचे या महिलांनी सांगितले.
चौकट आगामी आरडीसीसी बँक निवडणुक सुरुवातीला सर्वपक्षीय उमेदवार असणारे सहकार पॅनेलच्या माध्यमातून बिनविरोध करण्याचे विद्यमान अध्यक्ष तानाजी चोरगे यांनी जाहीर केले होते.मात्र काही दिवसांतच माजी खासदार व भाजपचे प्रदेश सचिव निलेश राणे यांनी स्वतंत्र पॅनल उभे करण्याचे जाहीर करून याला आव्हान दिले होते.त्यातच दोन दिवसांपूर्वी रत्नागिरीत आलेले काँग्रेसचे कोल्हापूर येथील आमदार,राज्यमंत्री ना.सतेज पाटील यांनीदेखील काँग्रेस कार्यकर्त्यांना आपली ताकद अजमावून त्याची माहिती पाठवण्यास सांगून एकप्रकारे निवडणूकित उतरण्याचे संकेतच दिले आहेत.अशा स्थितीत राष्ट्रवादी चिपळूण तालुकाध्यक्ष जयंद्रथ खताते यांनी देखील बँकेच्या मनमानी कारभारा विरोधात उघड बंद केल्याने या निवडणुकीत आता रंगत येणार असल्याचे दिसून येते.