🛑 माडखोल धरण झाले ओव्हरफ्लो..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : प्रथमेश गावडे

🎴सावंतवाडी दि.२४ :- चिपळूण तालुक्यातील तीवरे धरण फुटी नंतर शासनाने गंभीरपणे धरणांची देखभाल करणारी सक्षम यंत्रणा उभारली नसल्याचे चित्र सिंधुदुर्ग जिल्ह्यात उभे राहिले आहे. सिंधुदुर्ग जिल्ह्यातील लघुपाटबंधारे १६ धरणांपैकी फक्त ४ धरणांच्या देखभालीसाठी चौकीदार नेमण्यात आले असून अन्य १२ धरणावर पावसाळ्याच्या कालावधीसाठी तात्पुरत्या स्वरुपाची नामधारी व्यवस्था करण्यात आली आहे त्यामुळे धरण फुटीच्या भीतीची दखल कोण घेणार असा प्रश्न उभा राहिला आहे.

रत्नागिरी जिल्ह्यातील चिपळूण तालुक्यातील तिवरे धरण फुटी मुळे अनेक संसार उध्वस्त झाले, ही दुर्घटना समोर असताना जलसंपदा विभागाने लघुपाटबंधारे प्रकल्पावर देखभालीसाठी असणारे चौकीदार सेवानिवृत्त झाल्यानंतर ती पदे निर्लेखित करून तात्पुरती व्यवस्था सुरू ठेवली आहे. त्यामुळे पावसाळ्यामध्ये धरण फुटीच्या भीतीची टांगती तलवार या धरणाखालील गावांना भेडसावत आहे.

रत्नागिरी जिल्ह्यात पाटबंधारे विभागाने चौवीस तास करडी नजर ठेवण्यासाठी दोन व्यक्तींची निवड केली आहे, ती कंत्राटी पद्धतीची आहे. मात्र सिंधुदुर्ग जिल्ह्यात त्याच्या उलट पावसाळी कालावधीसाठी तात्पुरत्या स्वरूपाची नामधारी व्यवस्था करण्यात आली आहे. अतिवृष्टीमुळे धरण ओव्हरफ्लो होते त्यामुळे आजूबाजूच्या नागरिकांना धोका निर्माण होऊ शकतो हे तीवरे धरण फुटी नंतर उघड झाले आहे .

सिंधुदुर्ग जिल्ह्यात १६ लघु पाटबंधारे प्रकल्प आहेत या पैकी चोरगेवाडी, हातेरी, ओरोस बुद्रुक व शिरवल याठिकाणी देखभालीसाठी कायमस्वरूपी चौकीदार नेमले गेले आहेत. मात्र जिल्ह्यातील १२ लघुपाटबंधारे प्रकल्पावर मान्सून कालावधीसाठी तात्पुरत्या स्वरूपाची नामधारी स्थानिक व्यवस्था करण्यात आली आहे. यामध्ये आडेली, आंबोली, माडखोल, निळेली, सनमटेंब, तळेवाडी डिगस, दाभाचीवाडी, पावशी, पुळास,वाफोली, कारिवडे व धामापूर या प्रकल्पांचा समावेश आहे.या धरणावर मान्सून कालावधीसाठी तात्पुरत्या स्वरूपाची नामधारी स्थानिक व्यवस्था करण्यात आली आहे.

या धरण प्रकल्पावर कायमस्वरूपी चौकीदार यांची नेमणूक करण्यात आली होती मात्र चौकीदार सेवानिवृत्त झाल्यानंतर ती पदे निर्लेखित करण्यात आली. त्यानंतर त्या ठिकाणी दुसऱ्या व्यक्तीची नेमणूक करण्यात आलेली नाही. फक्त या धरण साइटवर पाऊस मोजण्यासाठी व्यक्ती नेमली असल्याचे बोलले जात आहे.

या लघुपाटबंधारे प्रकल्पापैकी काही प्रकल्प हे दुरुस्तीच्या प्रतीक्षेत आहे. त्या धरणांना पाणीगळती लागलेली आहे अशा धरणांच्या क्षेत्रात अतिवृष्टी झाल्यास धोका निर्माण होऊ शकतो याची कल्पना जलसंपदा विभागाला असूनही योग्य ती खबरदारी घेतली नसल्याचे सांगण्यात येत आहे त्यासाठी सर्व धरण प्रकल्पावर कायमस्वरूपी चौकीदार नेमला जावा अशी प्रकल्पाच्या क्षेत्रातील नागरिकांची मागणी आहे.