🛑 बनाव रचून पतीनेच केला पत्नीचा खून..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : अद्वैत अभ्यंकर

🎴राजापूर,दि-२६ :- शिवीगाळ करणे, त्रास देणे या कारणास्तव पतीने पत्नीचे नाक व तोंड दाबुन खुन केल्याची घटना परुळे (राजापुर )येथे शुक्रवारी घडली. यातील मयत ही ३५ वर्षीय महिला असुन सौ सिध्दी उर्फ विद्या गजानन भोवड असे तिचे नाव आहे. परुळे सुतारवाडी येथील ती रहिवाशी असल्याची माहिती राजापुर पोलीसांनी दिली. दरम्यान पत्नीच्या हत्येनंतर तिचा आरोपी असलेला पती गजानन जगन्नाथ भोवड (वय ४०) याने बनाव करताना अज्ञात व्यक्तीने आपल्या पत्नीला जंगलात ओढुन नेऊन तिचा खुन केल्याचे भासवित पोलीसानाही गुंगारा देण्याचा प्रयत्न केला होता. मात्र चाणाक्ष पोलीसानी तो प्रयत्न हाणुन पाडला आणि अखेर आपणच पत्नीचा खुन केल्याची कबुली त्याने दिली.

दरम्यान आरोपी गजानन याच्या विरुध्द गुन्हा दाखल करण्यात आला असुन त्याला पोलीसानी अटक केली आहे. याबाबत पोलीसांनी दिलेल्या माहितीनुसार राजापुर तालुक्यातील परुळे येथे सुतारवाडीत भोवड कुटुंबिय सामायिक घरात राहतात. त्यामध्ये एका भागात आरोपी गजानन, दुसऱ्या भागात आरोपीचे आईवडील व भाऊ आणि तिसऱ्या भागात आरोपीच्या चुलतीचे कुटुंब राहते. आरोपी गजानन हा त्याची पत्नी सिध्दी उर्फ विद्या व आठ वर्षीय मुलगा यांच्या समवेत कळवा (ठाणे ) येथे रहात होता. तो परळ येथे एका प्रिंटींग प्रेसमध्ये लॅमिनेशन ऑपरेटर म्हणुन कामाला होता. एप्रिल मध्ये लागलेल्या लॉकडाऊन मध्ये गजाननची नोकरी गेल्याने तो पत्नी व मुलासह दिनांक २९/५/२०२१ ला आपल्या परुळे गावी आला होता. त्यानंतर ते गावीच होते.

मयत सिध्दी उर्फ विद्या हिची बहिण परुळे येथे रहात असुन काही दिवसांपुर्वी तिच्या बहिणीचे मुल पोटातच दगावले होते. बहिणीला बघण्यासाठी ती दोन वेळा तिच्या घरी गेली होती. शुक्रवारी दुपारी दोघे पती पत्नी पुन्हा एकदा सिध्दीच्या बहिणीला भेटण्यासाठी निघाले होते. वाटेत असलेला वहाळ पार करुन दोघे बाजुला असलेल्या जंगलातुन चालले असता पती गजानने अचानक सिध्दीचे नाक व तोंड दाबुन धरले त्यामध्ये तिचा जागीच मृत्यु झाला होता .

विद्या मृत झाल्याचे लक्षात येताच गजानन घरी आला व आजुबाजुच्या मंडळींशी बोलताना त्याने बनाव केला की आपण पत्नी समवेत चाललो असता समोरुन एक पांढऱ्या चेहऱ्याची राकट व विचित्र व्यक्ती आली. त्या व्यक्तीने मला ढकलुन दिले व पत्नीला उचलुन तो जंगलात निघुन गेला तेव्हा आपली शुध्द हरपली होती. मात्र त्यातुन सावरल्यावर आपण घरी आलो असे त्याने खोटेच सांगितले. त्यानंतर तेथे उपस्थीत असलेले अनेक ग्रामस्थ विद्याचा शोध घेत जंगलच्या दिशेने निघाले परुळे तट अशी त्या परीसराची ओळख असुन तेथे आजुबाजुला शोध घेत असता सिध्दी मृतावस्थेत आढळुन आली. या घटनेची खबर परुळे गावचे पोलीस पाटील विलास कस्पले यांना देण्यात आली. मात्र ते होम आयसोलेशन मध्ये असल्याने त्यानी रायपाटण पोलीसांना झाल्या प्रकाराची माहिती दिली.

पत्नीच्या खुनानंतर बनाव रचलेल्या पती गजाननने पोलीसांना देखील कुणी अज्ञात व्यक्ती आपल्या पत्नीला ओढीत घेवुन गेली आणि नंतर ती मृतावस्थेत आढळल्याची खोटेच सांगितले.

झाल्या घटनेची खबर मिळताच राजापुर पोलीस ठाण्याचे निरीक्षक जनार्दन परबकर, सहाय्यक पोलीस निरीक्षक मधुकर मौळे, पोलीस उपनिरीक्षक शिल्पा वेंगुर्लेकर, सहाय्यक पोलीस उपनिरीक्षक बसवंत हेडकॉंस्टेबल वाघाटे, आर डी तळेकर, महिला कर्मचारी नामये, होमगार्ड शिंदे, प्रभुलकर, पोलीस वाहन चालक वाडकर,बाणे आदी घटनास्थळी दाखल झाले. तर उपविभागिय पोलीस अधिकारी (लांजा) कानडे हे देखील परुळे येथे दाखल झाले. पंचनामा करण्यात आला. मयत सिध्दीचा मृतदेह रायपाटण ग्रामीण रुग्णालयात आणण्यात आला. शुक्रवारी रात्री अकरा वाजल्यापासुन मयत सिध्दीचा पती गजानन याची पोलीस कसुन चौकशी करीत होते मात्र पोलीसांना तपासात तो गुंगारा देत होता. कुणा अज्ञात व्यक्तीने तिला ओढित नेले व नंतर ती मृत सापडली हेच सांगत होता. पोलीसांनी त्याच्यावर प्रश्नाचा भडीमार सुरुच ठेवला होता. अखेर पती गजानन याने पोलिसांपुढे शरणागती पत्करून पत्नी सिध्दीचा ती शिवीगाळ करून त्रास द्यायची म्हणून खुन आपणच केल्याची कबुली दिली. खुनानंतर काही तासातच पोलीसांनी खुनाचा यशस्वी छडा लाऊन भादवि कलम ३०२,२०१ अन्वये गुन्हा दाखल केला असुन त्याला अटक केली आहे. अत्यंत गुंतागुंतीच्या या प्रकरणात सिध्दीच्या खुनामागे आणखी काही कारणे आहेत का याचा तपास राजापुर पोलीस करीत आहेत. या संपुर्ण प्रकरणाचा तपास राजापूरचे पोलीस निरीक्षक जनार्दन परबकर करीत आहेत. या झालेल्या खुनामुळे परुळे मध्ये खळबळ उडाली आहे. आता पोलीस तपासात आणखी कोणती माहिती समोर येते त्याकडे सर्वांचे लक्ष लागुन राहिले आहे.