🛑 “लखोबा” रामदेव संदर्भात मोदी सरकार आणि महाराष्ट्रातील भाजप खासदारांना काही प्रश्न?

🎥 कोकण लाईव्ह ब्रेकिंग न्यूज

अचुक बातमी थेट हल्ला

✍️ ब्युरो न्यूज : कोकण लाईव्ह ब्रेकिंग

🎴सिंधुदुर्ग, दि-२७ :- १) कोरोना काळात गेले पंधरा महिने अविरतपणे दिवस रात्र कोरोना रूग्णांची सेवा करणाऱ्या कोरोना योध्दा डॉक्टरांची “टर टर डॉक्टर” अशी अपमानास्पद खिल्ली उडवणाऱ्या तसेच कोरोनामुळे मृत्यूचे तांडव सुरू असताना “ॲलोपथी” उपचार पध्दती बद्दल जाणीवपूर्वक समाजात संभ्रम निर्माण करणाऱ्या रामदेव या व्यक्तीला epidemic act 1897 अंतर्गत केंद्रातील मोदी सरकार अटक का करत नाहीये?

२) आपल्या जीवाची पर्वा न करता रूग्णांची सेवा करत असलेल्या आणि गेल्या पंधरा महिन्यात हजारच्या वर संख्येने शहीद झालेल्या देशातील ॲलोपथी डॉक्टर्सना मुजोरपणे प्रतिप्रश्न विचारणाऱ्या रामदेव या व्यक्तीला मोदी सरकारचे समर्थन आहे का?

३) जर हा रामदेव उद्दामपणे ॲलोपथी या औषध व आरोग्य प्रणालीवर कुठलीही शैक्षणिक पात्रता नसताना खालच्या पातळीवर टिका करत आहे आणि समाजात ॲलोपथी सायन्स तसेच उपचार पद्धती बद्दल संशय निर्माण करत आहे, अशावेळी गेल्या वर्षी डाॅक्टर्स, नर्सेस आणि इतर आरोग्य कर्मचारी वर्गावर फुलांचा वर्षाव करणारे मोदी सरकार आता बघ्याची भूमिका का घेत आहे?

४)कुठल्याही अन्न आणि औषध नियंत्रण विभागाची किंवा राष्ट्रीय आरोग्य संशोधन संस्थेची अधिकृत परवानगी नसलेले “कोरोनील” हे बोगस औषध कोरोनावर गुणकारी औषध आहे असा दावा करत तसेच या औषधाला जागतिक आरोग्य संघटनेने संमती दिलेली आहे असा निखालस खोटा प्रचार करून देशाच्या जनतेला गंडा घालून हजारो कोटी रुपये लाटणारा आणि हजारो लाखो लोकांच्या मृत्यूला कारणीभूत ठरलेला रामदेव हा या देशाचा मोठा गुन्हेगार नाही का?

५)याच कोरोनील औषधाच्या लाॅंच प्रमोशनसाठी आवर्जून उपस्थित असलेल्या देशाचे आरोग्यमंत्री डॉ हर्षवर्धन यांची या प्रकरणी केंद्रीय मंत्रिमंडळातून तात्काळ हकालपट्टी करून त्यांच्यावर अनेक सामान्यांच्या मृत्यूस कारणीभूत ठरल्याबद्दल गुन्हा दाखल व्हायला नको का?

६)रामदेववर गुन्हा दाखल करण्यासाठी जनतेच्या वतीने महाराष्ट्रातील भाजप खासदार मोदी सरकार समोर आग्रही भूमिका घेतील का?

७)जनतेची फसवणूक करणाऱ्या पतंजली उद्योगाची चौकशी करून त्यावर बंदी आणली जाईल का?