🛑 नागेंद्र परब यांना ठेकेदारी विषयी बोलण्याचा नैतिक अधिकारच नाही..

🛑 ते तर खासदार विनायक राऊत यांचे कमिशन एजंट आहेत

🛑 जिल्हा परिषद वित्त व बांधकाम सभापती श्री महेंद्र चव्हाण यांचे प्रत्युत्तर..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : सुनील आचरेकर

🎴सिंधुदुर्ग, दि-०५ :- जिल्हा परिषदेचे शिवसेनेचे गटनेते नागेन्द्र परब हे खासदार विनायक राऊत यांचे कमिशन एजंट असून विनायक राऊत यांच्या माध्यमातून येणाऱ्या कामांची ठेकेदारांकडून सेटलमेंट करायचे काम त्यांच्यामार्फत होते. खासदारांच्या सर्व कामांचे नियोजन हे नागेंद्र परब स्वतः करतात परंतु आज पर्यंत त्यांचा झेंडा घेतलेल्या मतदार संघात त्यांनी विकास कामे केल्याचे कधीच आढळत नाही. उलट ठेकेदारांना आवश्यक अशीच विकास कामे नागेंद्र परब करत आले आहेत. त्यामुळे या विषयात त्यांनी न बोललेलं बरं. जिल्हा नियोजन समितीच्या अनेक याद्यांमध्ये आर्थिक व्यवहार करून बदल करण्यात नागेंद्र परब यांचाच मोठा सहभाग होता. काही महिन्यांपूर्वी जिल्ह्यातील निष्ठावंत शिवसैनिक हे नागेंद्र परब यांच्या या कारनाम्यांमुळे नाराज होऊन त्यांनी थेट मातोश्री गाठली होती. वरिष्ठ पातळीवरून कानउघडणी झाल्यावर नागेंद्र परब यांना नमते घ्यावे लागले होते. स्वतःचे घर व राजकारण कमिशनच्या जीवावर चालवणाऱ्या नागेंद्र परब यांनी जिल्हा परिषदेच्या कारभारावर न बोललेलेच बरे अन्यथा त्यांची कुंडली बाहेर काढू असा इशारा जिल्हा परिषदचे वित्त व बांधकाम सभापती महेंद्र चव्हाण यांनी दिला आहे.

नागेन्द्र परब हे जिल्हा परिषदेमध्ये पाच वर्षांपूर्वी सदस्य म्हणून निवडून आले परंतु गेल्या साडेचार वर्षात मुग गिळून गप्प बसल्यासारखे त्यांची परिस्थिती होती. आता जिल्हा परिषदेच्या निवडणुका समोर दिसू लागल्याने पुन्हा एकदा त्यांची पत्रकबाजी सुरू झालेली आहे. नागेंद्र परब यांना जिल्ह्यातील ठेकेदारी बद्दल एवढीच माहिती घ्यायची असेल तर पालकमंत्री उदय सामंत व आमदार वैभव नाईक यांच्या कुटुंबियांबद्दल अगोदर माहिती घ्यावी. आपल्याच कुटुंबातील सदस्यांना मोठी मोठी कंत्राटे दिल्यामुळे सिंधुदुर्ग जिल्ह्यातील बहुतांशी रस्ते खड्ड्यात घालण्यास हे दोन्ही नेते जबाबदार आहेत. नागेंद्र परब यांनी सिंधुदुर्ग जिल्ह्यातील एक जरी रस्ता सुस्थितीत दाखवला तरी त्यांचा जाहीर सत्कार करण्यात येईल असे देखील यांनी म्हटले आहे.

खासदार विनायक राऊत यांच्या संपर्क कार्यालयात बसून ठेकेदारांची सेटलमेंट करायची व कमिशन मिळवायचे हा एकमेव धंदा असलेल्या नागेंद्र परब यांनी जिल्हा परिषदेवर टीका करण हे हास्यास्पद असून आहे सिंधुदुर्ग जिल्हा परिषदेला आज पर्यंत राज्यस्तरीय व केंद्रस्तरीय अनेक पुरस्कार मिळालेले आहेत. महत्त्वाचे म्हणजे नागेंद्र परब ज्या पक्षात आहेत ती शिवसेना गेली सात वर्ष सत्तेत असताना देखील सिंधुदुर्ग जिल्हा परिषदेचा गौरव राज्य सरकारकडून करण्यात आलेला आहे. त्यामुळे निवडणुका तोंडावर आल्या म्हणून जिल्हा परिषदेची प्रतिमा डागाळण्याचा केविलवाणा प्रयत्न नागेंद्र परब यांनी करू नये असा सल्ला देखील महेंद्र चव्हाण यांनी दिला आहे.

सन्माननीय नारायणराव राणे यांची केंद्रात कॅबिनेट मंत्री पदी वर्णी लागल्यामुळे जिल्ह्यातील काही शिवसेना पदाधिकाऱ्यांना पोटशूळ उठलेला आहे. त्यामुळेच स्वतःचे राजकीय अस्तित्व जिवंत ठेवण्याकरता अशाप्रकारची वायफळ बडबड करून प्रसिद्धीत राहण्याचा नागेंद्र परब व त्यांचे सहकारी प्रयत्न करत आहेत.