🛑 सोशल क्लबच्या नावाखाली सुरू असलेल्या या जुगार अड्ड्यांवर पोलीस कारवाई करणार का ? ; स्थानिकांमधून प्रश्न

🛑 अवैद्य धंद्यांना आळा कधी बसणार हे मात्र अनुत्तरीतच..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ ब्युरो न्यूज : कोकण लाईव्ह ब्रेकिंग

🎴सिंधुदुर्ग, दि-२० :- सिंधुदुर्ग जिल्ह्यात कित्येकवेळा कारवाई होऊनही झारीतील शुक्राचार्यांच्या मदतीने अवैद्य धंदे बेकायदा सुरूच आहेत. सावंतवाडी, कुडाळ शहरातील अमली पदार्थांची प्रकरणे ताजी असतानाच सोशल क्लबच्या नावाखाली आता किनारपट्टीलगत असलेल्या मालवण शहरात देखील राजरोसपणे जुगार सुरू असल्याची माहिती मिळाली आहे. पोलीस प्रशासनाला सर्व काही माहिती असूनही किंबहुना त्यांच्याच वरदहस्ताने सुरू असलेल्या या अवैद्य धंद्यांना आळा कधी बसणार हे मात्र अनुत्तरीतच आहे.

कोकण लाईव्ह ब्रेकिंगने सिंधुदुर्ग जिल्ह्यातील अवैद्य धंद्यांविरोधात जोरदार मोहीम उघडली. यामुळे या बेकायदा धंद्यात सरसावलेले अवैद्य व्यावसायिक व त्यांना पडद्यामागून सहकार्य करणारे पोलीस यांचे धाबे दणाणले होते. कोकण लाईव्हने संपूर्ण कुंडलीच बाहेर काढत पोलिसांच्या कारवाईच्या मर्यादाच उघड केल्या होत्या. त्यानंतर खडबडून जागे झालेल्या पोलीस प्रशासनाने कारवाईचा फार्स करत काही प्रमाणात कारवाया केल्यात, मात्र अवैद्य व्यावसायिकांच्या हातातील बाहुले झालेल्या पोलिसांनी कारवाईच्या बेड्या ढिल्या करताच पुन्हा सिंधुदुर्ग जिल्ह्यात बेकायदा व्यवसाय फोफावले आहेत.

या व्यावसायिकांना खतपाणी घालण्याचे काम हे पोलिसच करत असल्याने ‘तू मारल्यासारखे कर, मी रडल्यासारखे करतो’ असे भासवीत आहेत. मात्र कोकण लाईव्हकडे पूर्ण जिल्ह्यातील बेकायदा व्यावसायिकांची कुंडली आहे. किनारपट्टीलगत पर्यटनासाठी प्रसिद्ध असलेल्या शहरात जुगार व्यवसाय फोफावला असून यामध्ये युवा पिढी बरबाद होताना दिसत आहे. आधीच कोरोनामुळे नोकरी गेल्याने युवक बेकार आहेत. अशा युवकांना हेरून त्यांचा या अवैद्य धंद्यांसाठी वापर करून घेण्यात येतो. सोशल क्लबच्या नावाखाली सुरू असलेल्या या जुगार अड्ड्यांवर पोलीस कारवाई करणार का? असा प्रश्न स्थानिकांमधून उपस्थित होत आहे.