🛑 केंद्रीय सुक्ष्म, लघु व मध्यम उद्योगमंत्री ना. नारायण राणे यांच्या खासदार निधीतून इन्सुली हायस्कूलच्या सांस्कृतिक सभागृहासाठी २० लाख रुपयांचा निधी मंजूर..

July 28, 2021 Pratik Rane

🛑 आज करण्यात आले सांस्कृतिक सभागृहाचे आ. नितेश राणे यांच्या हस्ते भूमिपूजन..

✍️ प्रतिनिधी : शैलेश गवस

🎴बांदा, दि-२८ :- शैक्षणिक विकास हाच सर्वांगीण विकासाचा केंद्रबिंदू आहे. दर्जेदार शिक्षणातून सामाजिक प्रगती होते. शालांत परीक्षांचा शंभर टक्के निकाल अभिनंदनीय आहेच. त्याचबरोबर विद्यार्थ्यांच्या बौद्धिक क्षमतेला आव्हान देणारे नवीन कोर्स संस्थेने राबविणे आवश्यक आहे. तरच आगामी काळात स्पर्धेला सक्षमतेने तोंड देणारी पिढी निर्माण होईल, असे प्रतिपादन युवा नेते आ. नितेश राणे यांनी इन्सुली येथे बोलताना केले.

केंद्रीय सुक्ष्म, लघु व मध्यम उद्योगमंत्री ना. नारायण राणे यांच्या खासदार निधीतून इन्सुली हायस्कूलच्या सांस्कृतिक सभागृहासाठी २० लाख रुपयांचा निधी मंजूर झाला आहे. या कामाचा भूमिपूजन सोहळा आ. नितेश राणे यांच्या हस्ते संपन्न झाला. यावेळी आयोजित कार्यक्रमात मार्गदर्शन करताना ते बोलत होते. यावेळी व्यासपीठावर भाजपा जिल्हाध्यक्ष राजन तेली, सरपंच तात्या वेंगुर्लेकर, जि. प. सदस्य उन्नती धुरी, माजी पं. स. सभापती मानसी धुरी, जिल्हा बँक संचालक गुरुनाथ पेडणेकर, बांदा सरपंच अक्रम खान, शेर्ले सरपंच उदय धुरी, भाजप सावंतवाडी मंडल तालुकाध्यक्ष अजय गोंदावळे, बांदा मंडळ तालुकाध्यक्ष महेश धुरी, संस्थाध्यक्ष उमेश पेडणेकर, माजी अध्यक्ष कृष्णाजी कोठावळे, उपाध्यक्ष काका चराटकर, सचिव विकास केरकर, निवृत्त पोलीस अधिकारी अशोक सावंत आदी उपस्थित होते.

आ. राणे म्हणाले, पंतप्रधान नरेंद्र मोदी यांनी कौशल्य विकास अभ्यासक्रमाला प्राधान्य दिले आहे. संस्थेने असे कोर्स राबविल्यास सहजपणे रोजगार उपलब्ध होईल. शैक्षणिक संस्थेच्या भौतिक गरजा पूर्ण होण्यासाठी आर्थिक श्रीमंतीपेक्षा विचारांची श्रीमंती असणे गरजेचे आहे. शैक्षणिक मदतीसाठी राणे कुटुंबिय कायम तत्पर आहे. राणे साहेबांचे तसे संस्कार आमच्यावर आहेत. इन्सुली गावात लवकरच जिआेचा इंटरनेट टॉवर उभारण्याचे आश्वासन दिले.

यावेळी उमेश पेडणेकर म्हणाले, केंद्रीय मंत्री ना. नारायण राणे यांच्याकडे इन्सुली हायस्कूलच्या सभागृहासाठी निधीची मागणी केल्यानंतर त्यांनी तातडीने २० लाखांचा निधी मंजूर केला. त्यामुळे प्रशालेची मोठी गरज पूर्ण झाली आहे. त्याबद्दल त्यांनी संस्था व गावाच्या वतीने आभार व्यक्त केले.

यावेळी राजन तेली, गुरुनाथ पेडणेकर, कृष्णाजी कोठावळे, उन्नती धुरी, मानसी धुरी, अशोक सावंत यांनी मनोगत व्यक्त केले. विविध स्पर्धांमध्ये यश संपादन केलेल्या प्राची गोविंद सावंत, हर्ष आनंद राणे व प्रतिक राजन गावकर यांना आ. नितेश राणे यांच्या हस्ते सन्मानित करण्यात आले. तसेच प्रशालेचे शिक्षक राजेश आजगावकर, विशाखा पालव, सलग ८ वर्षे शंभर टक्के निकाल दिल्याबद्दल मुख्याध्यापक विनोद गावकर यांचा सत्कार करण्यात आला. तसेच पूर स्थितीत जीव धोक्यात घालून बचावकार्यात सहभाग घेणार्‍या उत्कर्ष कला क्रीडा मंडळाच्या औदुंबर पालव, स्वागत नाटेकर व महेंद्र सावंत तसेच नवदुर्गा मंडळाचे शाम केरकर व सदस्यांना गौरविण्यात आले.

यावेळी ग्रा. पं. सदस्य कृष्णा सावंत, राधिका देसाई, दत्तात्रय खडपकर, वर्षा सावंत, स्वागत नाटेकर, पूजा पेडणेकर, नमिता नाईक, आरती परब, सोनाली मेस्त्री, भाजपचे पदाधिकारी मंदार नार्वेकर, संजय नाईक, श्याम सावंत, उल्हास सावंत, प्रताप सावंत, महेश धुरी आदींसह प्रशालेचे शिक्षक, शिक्षणप्रेमी व ग्रामस्थ उपस्थित होते. कार्यक्रमाचे प्रास्ताविक विकास केरकर, सुत्रसंचलन सचिन पालव तर आभार काका चराटकर यांनी मानले.

Leave a Reply