🛑 आंबोली घाटाच्या वरच्या बाजूने असलेली संस्थानकालीन गटारे तात्काळ दुरुस्त करावी ; माजी आमदार शिवराम दळवी

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : प्रथमेश गावडे

🎴आंबोली, दि. २१:- घाटाच्या वरच्या बाजूने असलेली संस्थानकालीन गटारे गेली दहा वर्षे साफ केलेली नाही. त्यामुळे दरडी कोसळण्याचे प्रकार वाढत आहे, तसेच घाट रस्त्यावर थेट पाणी पडल्यामुळे रस्त्याला त्याचा फटका बसत आहे. त्यामुळे योग्य ती उपाययोजना करा, अशी मागणी सावंतवाडी विधानसभा मतदार संघाचे माजी आमदार शिवराम दळवी यांनी बांधकामचे कार्यकारी अभियंता श्रीकांत माने यांच्याकडे केली आहे. दरम्यान दरवर्षी घाट कोसळत असल्यामुळे आंबोली-बेळगाव हा मुख्य मार्ग बंद होण्याची शक्यता असते, यापूर्वी अनेक वेळा असा प्रकार घडला आहे. त्यामुळे निवेदनाची दखल घेऊन तात्काळ याबाबत योग्य तो उपाययोजना करण्यात यावी, आवश्यक असल्यास वनविभागाची मदत घ्यावी, अशीही मागणी त्यांनी यावेळी केली आहे. याबाबत त्यांनी बांधकाम विभागाला निवेदन दिले आहे.

त्यात असे म्हटले आहे की, आंबोली घाट दरवर्षी धोकादायक स्थितीत असतो. त्या ठिकाणी दरडी कोसळण्याचे प्रमाण असते. परिणामी दोन्ही बाजूचा संपर्क तुटतो, असा प्रकार दरवर्षी होतो. त्यामुळे याबाबत योग्य ते नियोजन करणे गरजेचे आहे. त्यांनी दहा वर्षे गटारांची साफसफाई केले नाही. त्यामुळे ही परिस्थिती निर्माण होत आहे. त्यामुळे होणारी गैरसोय लक्षात घेता, एखादी एजन्सी नेमन हे काम तात्काळ करून घेण्यात यावे, अशी मागणी त्यांनी केली.