🛑 कुडाळ महसूल प्रशासनाचा अजब कारभार..

🛑 अवैध उत्खनन प्रकरणी तलाठयांच्या पंचनामा अहवालाला दाखवली केराची टोपली..

🛑 संगनमताने शासकीय जमिनीत झालेल्या बेकायदेशीर उत्खननबाबत मनसे आक्रमक..

🎥 कोकण लाईव्ह ब्रेकिंग न्यूज

अचुक बातमी थेट हल्ला

✍️ प्रतिनिधी : गणेश तोडकर

🎴कुडाळ, दि-०४ :- जिल्हयात अलीकडील काळात मायनिंग लॉबीचा सुळसुळाट होऊन शासकीय महसूल वसुलीत जबाबदार महसूल अधिकारी जाणीवपूर्वक दुर्लक्ष करत असल्याची अनेक प्रकरणे समोर आलेली आहेत. कुडाळ तालुक्यातील वाडीहुमरमळा येथील पीठढवळ नदीनजीक गट क्र 1551,1552 व 1553 या जमिनीत लगतच्या शासन मालकीच्या जमिनीत जवळपास 1400 ब्रास बेकायदेशीरपणे उत्खनन करून भराव टाकण्यात आलेला होता. सदरच्या उत्खननावेळी नदी पात्राचे नुकसान होऊन लगतच्या शेतकऱ्यांना भविष्यात पाणीपुरवठा होणे त्रासदायक ठरणारे असल्याने स्थानिक ग्रामस्थांनी याबाबत आक्षेप घेत महसूल विभागाकडे तक्रार केली होती. त्या तक्रारीच्या अनुषंगाने तलाठ्यांनी वस्तुस्थितीचा पंचनामा करून जवळपास 750 पेक्षा अधिक भराव टाकल्याचा व शेरी जमिनीत 1300 पेक्षा अधिक ब्रास उत्खनन झाल्याचा अहवाल कारवाईसाठी कुडाळ तहसील कार्यालयाकडे सादर केला. कुडाळ तहसील कार्यालयाकडून संबंधित जमीन मालकांना नोटीस देण्यात आलेली होती व सदरच्या नोटिसनंतर प्राप्त म्हणणे सरसकट ग्राह्य धरून प्रत्यक्षात दंडात्मक कारवाई करत असताना कुडाळ तहसील प्रशासनाने तलाठी कडील पंचनाम्याला केराची टोपली दाखवत मनमानीपणे फक्त सात ब्रास साठीच दंडात्मक आकारणी करून शासनाच्या लाखो रुपयांचे नुकसान केले आहे. शासकीय जमिनीत घुसखोरी करत बेकायदेशीर उत्खनन करणे व शासकीय मालमत्ता असलेल्या नदीपात्रात उत्खनन करून त्याचे नुकसान करत भविष्यात शेतकऱ्यांना पाणीपुरवठयास बाधा येईल अशी कृती करून करून देखील संबंधितांवर महसूल प्रशासनाकडून कारवाई नेमक्या कोणत्या हित संबंधांमुळे होत नाही असा सवाल सर्वसामान्य जनता विचारत आहे. शिवाय एरवी छोट्या-मोठ्या कर वसुलीसाठी सर्वसामान्य गोरगरीब जनतेकडे वसुलीसाठी तगादा लावणारे महसूलचे मुजोर अधिकारी मात्र मायनिंग लॉबीच्या वसूली संदर्भात डोळेझाक का करतात हा खरा प्रश्न आहे.एका परप्रांतीय व्यावसायिकाच्या घशात जमीन घालण्यासाठी शासकीय मालमत्तेचे नुकसान करून व लाखो रुपयांचा महसूल बुडीत करून देखील कुडाळ महसूल यंत्रणेकडून जाणीवपूर्वक दुर्लक्ष केला जात असेल तर मनसे याबाबत आक्रमक पवित्रा घेत जिल्हाधिकाऱ्यांकडे कारवाईसाठी पाठपुरावा करणार असल्याची माहिती मनसेचे कुडाळ तालुकाध्यक्ष प्रसाद गावडे यांनी माध्यमांशी बोलताना दिली.