🛑 रासायनिक खतांच्या गोणीवरील छापील किमतीपेक्षा कुणी जास्त किमतीने खत विक्री करण्याचा प्रयत्न केल्यास संबंधित विक्रेत्यांवर गुन्हा दाखल केला जाईल ; तालुका कृषी अधिकारी माधुरी मुटके

*🎥कोकण लाईव्ह ब्रेकिंग न्यूज*

_अचूक बातमी थेट हल्ला_

 *✍️ प्रतिनिधी:शैलेश गवस*

*🎴बांदा, दि-२६ :-* रासायनिक खतांच्या गोणीवरील छापील किमतीपेक्षा कुणी जास्त किमतीने खत विक्री करण्याचा प्रयत्न केल्यास संबंधित विक्रेत्यांवर गुन्हा दाखल करण्यात येणार आहे. सावंतवाडी तालुक्यातील कृषी सेवा केंद्राना मुळ रक्कमेनुसारच खतविक्री करण्याच्या सक्त सुचना देण्यात आल्याचे, सावंतवाडी तालुका कृषी अधिकारी माधुरी मुटके यांनी सांगितले.

छपाई किमतीपेक्षा जादा किंमत आकारता येत नाही. रासायनिक खतांच्या काही ग्रेडच्या किमती वाढल्या असल्या तरी जुन्या दराची खते (जुने दर छपाई असलेल्या बॅगा) जुन्याच दराने शेतकऱ्यांना विकणे बंधनकारक आहे. तसेच शेतकऱ्यांना पावती देणे बंधनकारक आहे. कुणी विक्रेता जुन्या दरातील खत वाढीव किंमत आकारून विकत असल्यास शेतकऱ्यांनी तात्काळ सिंधुदुर्ग जिल्हा गुणवत्ता नियंत्रण निरीक्षक यांच्याकडे तक्रार करू शकता किंवा आपल्याकडे तक्रार करावी, असे श्रीमती मुटके म्हणाल्या.

सावंतवाडी तालुक्यात सम्राट खताची मोठी मागणी आहे. परंतु या खताच्या गोणीवर छापील किंमत 1200 रुपये असून विक्रेत्यांकडून 2000 रुपयांप्रमाणे विक्री केली जात असल्याचे शेतकऱ्यांचे म्हणणे आहे. सर्वसामान्य शेतकरी लॉकडाऊन मध्ये मेटाकुटीस आला आणि असे जर खताचे भाव गगनाला भिडले तर शेतकऱ्यांनी शेती करायची की घरी बसायचे? त्यामुळे सावंतवाडी तालुक्यात अशा कृषी सेवा केंद्रात जास्त दराने खत विक्री करत असतील तर त्यांच्यावर तात्काळ फौजदारी गुन्हे दाखल करा, अशी मागणी महाराष्ट्र नवनिर्माण सेना सावंतवाडी तालुकाध्यक्ष गुरूदास गवंडे यांनी केली आहे. तसेच शेतकऱ्यांनी पॉस मशीन किंवा दुकानदाराची छापील पावती घेणे आवश्यक आहे. गोणीवरील किंमत व विक्री केलेल्या रक्कमेत तफावत दिसल्यास शेतकऱ्यांना वरील उर्वरीत रक्कम देण्याची जबाबदारी महाराष्ट्र नवनिर्माण सेनेची राहिल असेही गुरूदास गवंडे यांनी सांगीतले.