🛑 माठेवाड्यात जुगार अड्ड्यावर पोलिसांचा ‘सर्जिकल स्ट्राईक’; ११ जणांवर कारवाई!

🛑 बंगल्यात रंगला होता पत्त्यांचा डाव; रोख रक्कम, जुगाराचे साहित्य, चारचाकी-दुचाकी वाहने पोलिसांच्या ताब्यात

*✍ ब्युरो न्यूज : कोकण लाईव्ह ब्रेकिंग*

*🎴सावंतवाडी, दि-२८ :-* शहरातील माठेवाडा परिसरात एका बंगल्यात सुरू असलेल्या जुगार अड्ड्यावर सावंतवाडी पोलिसांनी छापा टाकत ११ जणांवर कारवाई केली. या कारवाईत रोख रक्कम, पत्त्यांची पाने, जुगारासाठी वापरले जाणारे साहित्य तसेच चारचाकी व दुचाकी वाहने असा मुद्देमाल पोलिसांनी ताब्यात घेतला.
माठेवाडा येथील एका बंगल्यात जुगार सुरू असल्याची माहिती पोलिसांना मिळाल्यानंतर पंचांसह पोलिसांनी घटनास्थळी धाड टाकली. यावेळी काही व्यक्ती गोलाकार बसून पत्त्यांवर जुगार खेळत असल्याचे आढळून आले. पोलिसांनी तत्काळ कारवाई करत घटनास्थळावरील साहित्य व रोख रक्कम ताब्यात घेतली.
या कारवाईत रुपेश संभाजी सावंत, गौरव झिळू गावडे, आकील इक्बाल बाडिवाले, पुंडलिक यशवंत सावंत, जेरॉन बाबतीस लॉड्रीक्स, सुनील विष्णू सावंत, संतोष सुमंत राऊळ, संजय वसंत गोंदावळे, शंकर शिवा सावंत, प्रभाकर हरी कदम आणि रामकृष्ण अशोक आडके यांच्यावर कारवाई करण्यात आल्याचे तक्रारीत नमूद आहे.
घटनास्थळावरून लाकडी गोलाकार प्लायवुडचे टेबल, पत्त्यांची पाने, विविध चलनी नोटा व इतर जुगाराचे साहित्य जप्त करण्यात आले. या प्रकरणी पोलीस हवालदार दीपक शिंदे यांनी सावंतवाडी पोलीस ठाण्यात फिर्याद दाखल केली आहे.
माठेवाड्यातील जुगार अड्ड्यावर पोलिसांनी केलेल्या या कारवाईमुळे शहरातील अवैध जुगार व्यवसायाविरोधात पोलिसांची धडक मोहीम पुन्हा चर्चेत आली आहे.