🛑 सिंधुदुर्गसाठी धोक्याची घंटा

🛑 अमली पदार्थांचे वाढते साम्राज्य आणि प्रशासनाची आंधळी मौन भूमिका!

🎥 KOKAN LIVE BREAKING || NEWS CHANNEL

✍️ संपादकीय : सीताराम गावडे

🎴सिंधुदुर्ग, दि-१२:- कोकणाच्या शांत, निसर्गरम्य किनारपट्टीवर सध्या एक अदृश्य विषारी प्रवाह वाहतोय अमली पदार्थांचा गोव्याहून सुरू होणाऱ्या या काळ्या व्यापाराने आता सिंधुदुर्गच्या मातीपर्यंत आपली मुळे घट्ट रोवली आहेत, समुद्रकिनारी दिसणारा पर्यटनाचा गजबजाट, कॅफेंतील झगमगाट, आणि रात्रीच्या पार्टी कल्चरच्या मागे आता एक काळा बाजार वाढतोय — आणि प्रशासन मात्र कागदी घोडे नाचवण्यात व्यस्त!

अमली पदार्थ विरोधी सप्ताह दरवर्षी साजरा होतो, भाषणं होतात, पोस्टर्स लावले जातात, शाळांमध्ये घोषवाक्ये ओरडली जातात पण वास्तवात एकही ठोस बदल घडत नाही.कारण या मोहिमा कागदोपत्री आहेत.प्रशासनाच्या गप्प बसण्यामागे निष्क्रियता आहे की दबाव, हा प्रश्नच आता जिल्ह्यातील सजग नागरिक विचारू लागले आहेत.

समुद्रकिनारी सुरू आहे काळा व्यापार

सिंधुदुर्गाला लाभलेल्या या विशाल किनारपट्टी भागांत गेल्या काही वर्षांत अमली पदार्थांची गुप्त देवाणघेवाण सुरू आहे.गोवा आणि सिंधुदुर्गच्या सीमारेषा केवळ भूगोलापुरत्या मर्यादित राहिलेल्या नाहीत; त्या आता ड्रग रूट झाल्या आहेत.गोव्यात येणारे पर्यटक, काही स्थानिक एजंट, आणि यांच्या संगनमताने ‘किक’ विकली जाते — आणि त्याची किंमत चुकवताना सिंधुदुर्गातील युवा पिढी स्वतःचा नाश खरेदी करते.आणि आम्ही हे जेव्हा वास्तव लिहितो तेव्हा असे धंदे करणाऱ्यांच्या बुडाला आग लागते, अंमली पदार्थांचे समुळ उच्चाटन व्हायला हवे अशी मागणी जोर धरत नाही तर बदनामी केली म्हणून साप साप म्हणून भुई थोपटली जाते,माझे पोलीस प्रशासनाला एवढेच सांगणे आहे, किनारपट्टी भागातील एक दोन वर्षात करोडपती झालेल्यांची यादी तयार करा,त्यांचे व्यवहार तपासा, कुठून कुठून पैसा येतो ते तुम्हाला समजेल व मासे गळाला लागतील.आम्ही तर कामालाच लागलो आहे कारन आमचे एकच वाक्य आहे,आम्ही कोणाच्या वाटेला जात नाही आणि कोणी आमच्याच वाटेवर येऊन आमच्याशी वाट मारी करण्याचा प्रयत्न केला तर त्याच्या वाटेवर जाऊन त्याची वाट लावल्याशिवाय आम्ही आमच्या वाटेवर परतत नाही हा आमचा इतिहास आहे हे संबंधितांनी ध्यानी ठेवावे,तुम्ही कोणाचीही कवच कुंडले घ्या ती तुमच्या उपयोगी येणार नाहीत हे मी आज तुम्हाला खात्रीशीर सागत आहे.

अचानक श्रीमंत झालेल्यांची चौकशी होणार का?

जिल्ह्यात असे काही लोक आहेत, जे काही वर्षांपूर्वी सामान्य होते आणि आज कोट्याधीश झाले आहेत.

ना व्यवसायकेंद्र, ना उद्योग — तरीही कोट्यावधींच्या मालमत्ता, गाड्या, आणि खर्च.पैशाचा स्रोत काय? कोणत्या मार्गाने पैसा येतो?

ही चौकशी प्रशासनाने करायला हवी.

संशयितांची बँक खाती तपासा, पैशाचा प्रवाह पाहा — तेव्हाच या रॅकेटची कडी उलगडेल.कारण पैशाचा माग काढलात, तर अमली पदार्थांच्या रॅकेटचा मेंदू सापडतो.

 “मी नाही त्यातली” – पण कडी लावा आतली कोण?

प्रत्येक प्रकरणात एक समान वाक्य ऐकू येतं – “मी नाही त्यातला!”मी नाही त्यातली..मात्र प्रत्येक वेळी रॅकेट अधिक मजबूत होतं.प्रशासनाने ठरवावं — ही भूमिका स्वीकारायची का उखडून टाकायची?काही लोकांच्या संरक्षणाखालीच हा व्यापार वाढतोय का, हा प्रश्न अधिक धोकादायक आहे.आता वेळ आली आहे नावं घेण्याची, चौकशीची आणि निलंबनाची.

न्यायालयीन दणक्यानंतर जागं प्रशासन

न्यायालयाकडून फटकारा मिळाल्यानंतरच हालचाल का होते?

सामाजिक कार्यकर्ते आणि पत्रकार वारंवार हाक देतात, पुरावे देतात, परंतु स्थानिक पोलिस आणि प्रशासन फक्त ‘तपास सुरू आहे’ म्हणत मौन बाळगतात.दरम्यान रॅकेट विस्तारतं, युवक नष्ट होतात, आणि गुन्हेगारी संस्कृती मजबूत होते.

काय करायला हवं — शब्द नव्हे कृती

विशेष तपास पथक (SIT) तात्काळ नेमावे — जिल्हा पोलीस, अमली पदार्थ विरोधी पथक, आणि आर्थिक गुन्हे शाखेचा समावेश असावा. सीमावर्ती तपासणी बळकट करा — गोवा सीमारेषेवर २४ तास पहारा व वाहन तपासणी अनिवार्य करावी.

संशयितांचा आर्थिक चौकशी अहवाल जाहीर करा — कुणाची संपत्ती गेल्या पाच वर्षांत किती वाढली, सार्वजनिकरित्या जाहीर करावी. स्थानिक नागरिकांना सहभागी करा — युवक, पत्रकार, व समाजकार्यकर्ते यांच्या सल्लागटांची स्थापना करावी.

शाळा आणि कॉलेजांमध्ये खऱ्या अर्थाने व्यसनमुक्ती मोहिम राबवा — भाषण नाही, समुपदेशन आणि उपचार केंद्रांची गरज आहे.पोलीस कारवाईस राजकीय संरक्षण नसावे — कोणाचंही नाव असो, ड्रग्ज विक्रेत्याला वाचवायचं थांबवावं.

*युवक म्हणजे भवितव्य — पण भविष्य नशेत हरवू लागलंय*

सिंधुदुर्ग जिल्ह्यातील अनेक पालक सांगतात दहावी,आकरावी पर्यंत मुलगा खूप चांगला होता,सरळ मार्गाने चालणारा होता,अहो एकुलता एक मुलगा आमचा,आता ऐंकतच नाही,काही विचारायला गेलं की बिथरतो, वस्तू फेकतो,आदळ आपट करतोय— “मुलगा वेगळा वागत आहे, बोलत नाही, झोपत नाही.” आणि

हेच सुरुवातीचे संकेत आहेत.एका नशेच्या डोसमुळे संपूर्ण आयुष्य उद्ध्वस्त होतं.काही तरुण चोरी, हल्ले, आणि आत्महत्येच्या घटनांमध्ये गुरफटले जात आहेत.या सगळ्याची मुळं एकाच ठिकाणी — अमली पदार्थांचे जाळं.

*वेळ अजून थोडी आहे*

सिंधुदुर्ग जिल्ह्याच्या ओळखीवर डाग बसण्याआधी शासनाने जागं व्हावं.

हे फक्त प्रशासनाचं युद्ध नाही — ही समाजाची जबाबदारी आहे.

अमली पदार्थ विरोधी सप्ताहाची औपचारिकता संपवून, व्यवहारिक लढा सुरू करण्याची वेळ आली आहे.

नाहीतर हा प्रदेश नशेच्या सावलीत गडप होईल — आणि मग उरणार नाही कोकण, उरणार नाही सिंधुदुर्गची ओळख, उरणार नाही युवाशक्ती!

*आता गरज आहे मतांच्या बेरजेचे राजकारण करण्या ऐवजी सिंधुदुर्ग वाचवणे*

सिंधुदुर्ग जिल्ह्यातील सत्ताधारी,व विरोधक अमंली पदार्थांच्या बाबतीत हवा तसा उठाव करताना दिसत नाही, विरोधकांनी तर या गोष्टीवर रान उठवायला हवे होते,जेव्हा जिल्ह्यातील ५३ डॉ जिल्हाधिकाऱ्यांना निवेदन देऊन सिंधुदुर्गातील वस्तू स्थिती कथन करतात आपला अनुभव सांगतात तेव्हा तरी विरोधकांनी जागे होऊन जन आंदोलन उभारून प्रशासनाला धारेवर धरायला हवे होते मात्र विरोधक चिडीचूप. आणि सत्ताधाऱ्यांवर आरोप करण्यात व्यस्त.

*खरे कोतूक कुडाळ मालवण मतदारसंघाचे आमदार निलेश राणे यांचेच*

कुडाळ मालवण मतदारसंघाचे आमदार निलेश राणे यांनी विधानसभेत यावर जोरदार पणे वस्तू स्थिती मांडली, पोलिस अधीक्षकांना भेटून वस्तुस्थिती कथन केली,एवढ्यावर न थांबता आपली जाहीर भूमिका मिडीया समोर मांडली, कोकण लाईव्ह ब्रेकींग न्यूज चॅनेल च्या अवैध धंदे अमली पदार्थांच्या लढ्याला जाहिर पाठबळ दिले, परिणामाची चिंता न करता राजकारणातील बेरीज वजाबाकी न पाहता सिंधुदुर्ग जिल्ह्यातील भल्याचा विचार करणारा असा आमदार वर्षानुवर्षे मतदारसंघाला लाभावा अशी जिल्ह्यातील सुजाण जनतेची भावना आहे.आज प्रत्येक लोकप्रतिनिधी ने अशी भूमिका घेतली व पोलिसांनी मनावर घेतले तर जिल्ह्यातील अवैध धंदे अमली पदार्थांचे समुळ उच्चाटन व्हायला वेळ लागणार नाही एवढे मात्र निश्चित.