🛑 साटेली-भेडशी केंद्रशाळा ‘रोल मॉडेल’ ठरणार ; गटशिक्षणाधिकारी नदाफ यांचा विश्वास

🛑 प्रवेशोत्सव उत्साहात संपन्न ; संगणक शिक्षण, स्पर्धा परीक्षा यांच्यावर भर

🎥 KOKAN LIVE BREAKING || NEWS CHANNEL

✍️ प्रतिनिधी : प्रतिक राणे

🎴दोडामार्ग, दि-१७:- साटेली-भेडशी केंद्रशाळेची गुणवत्तापूर्ण वाटचाल पाहता ही शाळा भविष्यात ‘रोल मॉडेल’ ठरेल, असा ठाम विश्वास गटशिक्षणाधिकारी निसार नदाफ यांनी व्यक्त केला. शाळेच्या नवागत विद्यार्थ्यांसाठी आयोजित करण्यात आलेला प्रवेशोत्सव सोमवार दि-१६ रोजी शाळेच्या पहिल्याच दिवशी उत्साहात पार पडला. यावेळी नदाफ प्रमुख पाहुणे म्हणून उपस्थित होते.

गुणवत्तेसाठी एकजूट प्रयत्न

या शाळेत विविध उपक्रम प्रभावीपणे राबवले जात असून मुख्याध्यापक पूनम पालव यांच्या योग्य नियोजनाखाली सर्व शिक्षक, पालक, केंद्रप्रमुख, शाळा व्यवस्थापन समितीचे सदस्य आणि पदाधिकारी गुणवत्तेच्या उंचीवर पोहचवण्यासाठी सातत्याने प्रयत्न करत आहेत. त्यामुळे येथे शिकणाऱ्या विद्यार्थ्यांचा शैक्षणिक पाया भक्कम होत आहे. सातवीपर्यंत शिक्षण घेतलेली मुले इतर शाळांमध्ये गेल्यानंतरही मागे पडत नाहीत, असे श्री. नदाफ यांनी सांगितले.

एमएस-सीआयटी अभ्यासक्रमाची घोषणा

शाळेत सुसज्ज संगणक प्रयोगशाळा उपलब्ध असल्याने यावर्षीपासून ६ वी व ७ वीच्या विद्यार्थ्यांसाठी एमएस-सीआयटी अभ्यासक्रम सुरू करण्याचा मानस असल्याचे नदाफ यांनी जाहीर केले. त्यामुळे या शाळेतील विद्यार्थी इंग्रजी माध्यमातील विद्यार्थ्यांपेक्षा सरस ठरतील, असा विश्वासही त्यांनी व्यक्त केला.

स्पर्धा परीक्षांवर भर

विद्यार्थ्यांनी ए. पी. जे. अब्दुल कलाम, नवोदय, शिष्यवृत्ती यांसारख्या स्पर्धा परीक्षांत सहभागी व्हावे आणि गुणवत्तायादीत स्थान मिळवावे, असे आवाहन श्री. नदाफ यांनी केले. “या यशस्वी विद्यार्थ्यांचे अभिनंदन करण्यासाठी मी स्वतः येईन,” असेही त्यांनी सांगितले.

या कार्यक्रमास सरपंच छाया धर्णे, विस्तार अधिकारी तायडे, केंद्रप्रमुख सूर्यकांत नाईक, मुख्याध्यापक पूनम पालव, निवृत्त मुख्याध्यापक अभिमन्यू नाईक, शिक्षणप्रेमी वैभव सुतार आदी मान्यवर उपस्थित होते.

शिक्षक दीपक दळवी, संपदा दळवी, मिलन पाटील, सीमा नाईक, नूतन शिंदे यांनी कार्यक्रम यशस्वी करण्यासाठी विशेष मेहनत घेतली. पालक तुळशीदास पारधी, श्रीमती ओतारी, शाळा व्यवस्थापन समिती सदस्य नेहा ठाकूर, अंगणवाडी सेविका व मदतनीसही उपस्थित होते.

विद्यार्थ्यांना गौरव व साहित्यवाटप

कार्यक्रमात नवागत विद्यार्थ्यांचे औक्षण करून स्वागत करण्यात आले, तसेच त्यांच्या पाऊलखुणांचे ठसे घेण्यात आले. उन्हाळी सुटीनंतर राबवले गेलेल्या विविध ऑनलाइन उपक्रमांमध्ये प्राविण्य मिळवलेल्या विद्यार्थ्यांना सन्मानचिन्ह देऊन गौरवण्यात आले. वह्या, बूट आणि गणवेशाचे प्रातिनिधिक वाटपही करण्यात आले.

उपक्रमासाठी जाहीर घोषणा

सरपंच छाया धर्णे यांनी मराठी विषयात प्रथम क्रमांक मिळवणाऱ्या विद्यार्थ्यांना दरवर्षी बक्षीस देण्याची घोषणा केली. केंद्रप्रमुख नाईक यांनी विद्यार्थ्यांनी विज्ञान व संगणक प्रयोगशाळेचा लाभ घ्यावा, सर्व उपक्रमांमध्ये सक्रिय सहभाग घ्यावा, असे आवाहन केले.

यावेळी कार्यक्रमाचे सूत्रसंचालन, प्रास्ताविक आणि आभार प्रदर्शन पदवीधर शिक्षक दीपक दळवी यांनी केले.संपूर्ण प्रवेशोत्सव पारंपरिक व दिमाखात पार पडला.