🛑 सामाजिक बांधिलकीच्या तत्परतेमुळे तरुणाचा जीव वाचला

🎥 KOKAN LIVE BREAKING || NEWS CHANNEL

✍️ प्रतिनिधी : प्रशांत मोरजकर

🎴सावंतवाडी, दि-८:- सामाजिक बंधिलकीच्या भावनेतून तत्काळ मदत आणि प्रसंगावधान दाखवून मुंबईतील एका तरुणाचा हृदयविकाराच्या झटक्यातून जीव वाचवण्यात यश आले आहे. संदीप विष्णू शिंदे (रा. विरार) असे या तरुणाचे नाव असून ही घटना काल रात्री ११ वाजण्याच्या सुमारास घडली.

संदीप शिंदे हे विरार येथून माणगाव येथे मंदिरदर्शनासाठी आले होते. काल रात्री ११ वाजता त्यांना छातीत तीव्र वेदना होऊ लागल्या. त्यांनी तातडीने सावंतवाडी बसस्थानकातील एका प्रवाशांकडे मदत मागितली. प्रवाशांनी तात्काळ सामाजिक बंधिलकी प्रतिष्ठानच्या कार्यकर्त्यांना संपर्क साधला. तिथून शिंदे यांना जवळच्या आरोग्य केंद्रात नेण्यात आले, जिथे पुढील उपचारासाठी ओरोस येथे हलवण्याचा सल्ला देण्यात आला.

शिंदे यांच्याजवळ कोणीही नातेवाईक नसल्यामुळे त्यांना जिल्हा रुग्णालयात नेण्याची जबाबदारी सामाजिक बंधिलकी प्रतिष्ठानचे रवी जाधव आणि लक्ष्मण कदम यांनी स्वीकारली. १०८ क्रमांकाच्या रुग्णवाहिकेला यायला उशीर होत असल्यामुळे त्यांनी खासगी वाहनाने शिंदे यांना तात्काळ ओरोस येथील जिल्हा रुग्णालयात दाखल केले. या कामात सावंतवाडीचे माजी उपनगराध्यक्ष अनिकेत कोंडुसकर यांचेही योगदान लाभले. त्यांनी आपल्या वाहनातून पेट्रोल पंपापर्यंत सहकार्य केले.

ओरोस येथे डॉक्टरांनी तातडीने उपचार सुरू केले आणि शिंदे यांना वाचवण्यात यश मिळाले. त्यांची प्रकृती सध्या स्थिर असून मुंबईतील त्यांच्या नातेवाईकांशी संपर्क साधण्यात आला आहे.

या सेवाभावी कार्यासाठी डॉक्टर, सावंतवाडी पोलीस कर्मचारी, श्री. के. कदम, अभिजित कांबळे, रवी जाधव, लक्ष्मण कदम, अनिकेत कोंडुसकर यांचे विशेष योगदान आहे. संदीप शिंदे यांनी मनःपूर्वक आभार मानले असून सामाजिक बंधिलकी प्रतिष्ठानच्या त्वरित प्रतिसादामुळे आणि समन्वयामुळे एक जीव वाचवला गेला, हे विशेष उल्लेखनीय आहे.