🛑 “लाडक्या बाबू काकांचा निरोप… मोर्लेच्या मातीतील भक्तिभावाचं तेज हरपलं!”

🛑 कै. महादेव पांडुरंग गवस यांना भावपूर्ण श्रद्धांजली !! बारावा दिवस!!

🛑 मोर्ले गावाचे माजी सरपंच कै. महादेव गवस ऊर्फ बाबू काकांवर विशेष लेख

🎥 KOKAN LIVE BREAKING || NEWS CHANNEL

✍️ उपसंपादक : प्रतिक राणे

नेता खरा तो, जो माणुसकी जपतो,
भजनात रंगतो, गावासाठी झटतो
आज काळजाचा तुकडा हरवला,
मोर्लेच्या मातीचा आधारच गेला..

🎴दोडामार्ग, दि-२५:- मोर्ले गावाचे माजी सरपंच आणि माजी तंटामुक्ती अध्यक्ष कै. महादेव पांडुरंग गवस ऊर्फ बाबू (वय ५८) यांचे बुधवार, दिनांक १४ मे रोजी रात्री १०.४५ वाजता गोवा येथील बांबोळी मेडिकल कॉलेजमध्ये उपचार घेत असताना दुःखद निधन झाले. त्यांच्या निधनाने मोर्ले गावाने एक निष्ठावान, कार्यक्षम आणि माणसांच्या हृदयात घर करून राहिलेला नेता गमावला आहे.
बाबू काका हे मोर्ले गावातील सर्वांचे लाडके, प्रेमाने हाक मारले जाणारे व्यक्तिमत्त्व होते. त्यांच्या मृदू स्वभावामुळे आणि मनमिळावूपणामुळे लहानांपासून मोठ्यांपर्यंत सगळ्यांशी त्यांचं घट्ट नातं जुळलेलं होतं.
त्यांचे सुपुत्र प्रथमेश गवस हे ‘युवा कोकण’ डिजिटल मीडिया चॅनलचे संपादक असून ‘व्हॉईस ऑफ मीडिया’ सिंधुदुर्ग जिल्हा कार्यकारिणीचे सदस्य आहेत. त्यांच्या पश्चात आई, पत्नी, मुलगा, विवाहित मुलगी, बहीण असा परिवार आहे.
कै. महादेव ऊर्फ बाबू गवस हे केवळ पदाधिकारी नव्हते, तर गावासाठी झटणारे खरे ‘भगीरथ’ होते. २०१८ साली सरपंचपद भूषवताना त्यांनी मोर्ले – पारगड रस्त्यासाठी पुढाकार घेत विशेष प्रयत्न केले, बीएसएनएल नेटवर्कसाठी सतत पाठपुरावा केला, तसेच गावातील जिल्हा परिषद मराठी शाळेला डिजिटल स्वरूप देण्याचे महत्त्वपूर्ण कार्य केले.
तिलारी पंचक्रोशीत वाढलेल्या हत्तींच्या त्रासाच्या पार्श्वभूमीवर त्यांनी ‘हत्ती हटाव’ मोहिमेसाठी विशेष प्रयत्न केले. ग्रामस्थांच्या सुरक्षेसाठी त्यांनी प्रशासनाशी सातत्याने संपर्क साधून उपाययोजना राबवल्या.

भजन हे त्यांच्या जीवनाचा आत्मा होता

बाबू काका केवळ भजनी बुवा नव्हते, तर गोड आवाजात भक्तिरस सांडणारे, शब्दाशब्दांत भाव जागवणारे, आणि गावाच्या प्रत्येक कार्यक्रमात उपस्थित राहून भक्तिमय वातावरण तयार करणारे एक तेजस्वी अस्तित्व होते. ‘हरी विठ्ठल’ म्हणताना त्यांच्या आवाजातील आर्तता थेट काळजाला स्पर्शून जायची. त्यांच्या भजनांनी केवळ भक्ती नाही, तर गावात एकोपा, समाधान आणि स्नेह फुलवला होता. त्यांनी अनेकदा भजन स्पर्धांमध्ये गावाचं प्रतिनिधित्व केलं आणि पारितोषिकही मिळवली होती.
त्यांची भक्ती, नम्रता आणि सूरातली ताकद हे त्यांचं खरे वैभव होतं. गावात कोणताही धार्मिक अथवा सांस्कृतिक कार्यक्रम असो, बाबू काका हजर असायचेच. त्यांच्या उपस्थितीने वातावरण भारावून जायचं.
ते देवस्थान कमिटीचे अध्यक्ष, नंतर सदस्य, तसेच तंटामुक्ती समितीचे अध्यक्ष म्हणूनही कार्यरत राहिले. त्यांच्या नेतृत्वात गावात शांतता, संवाद आणि समन्वयाचे वातावरण तयार झाले.
आज मोर्ले गाव आणि संपूर्ण परिसर त्यांच्या आठवणीने ओथंबून गेला आहे. त्यांच्या साधेपणाची, कार्यनिष्ठेची, आणि भक्तिभावाची शिदोरी त्यांनी मागे ठेवली आहे.

बाबू काका – प्रत्येकाच्या हृदयात घर करून गेलेलं एक नाव

त्यांच्या गोड सुरांचा नाद आजही गावाच्या मंदिरात, देवळ्यांच्या पारावर आणि गावकऱ्यांच्या हृदयात निनादत राहील. त्यांच्या जाण्याने केवळ एक व्यक्ती नाही, तर एक युग संपले आहे. मोर्ले गावाच्या मातीतील एक तेजस्वी दीप विझला आहे…

भावपूर्ण श्रद्धांजली काकानू तुमची उणीव कायम राहील