🟥 नडगिवे येथे गोवा बनावटीची दारु वाहतूक करणाऱ्या आयशर टेम्पोला अपघात..

🟥 टेम्पो चालक झाला फरार ; ८ लाख ७८ हजार ४०० रुपये किंमतीची आढळली दारु..

🎴कणकवली,दि-०३:- मुंबई – गोवा राष्ट्रीय महामार्गावर नडगिवे बांबरवाडी येथे बुधवारी रात्री १२.३० च्या मध्यरात्री नंतर गोवा येथून मुंबईच्या दिशेने जाणारा आयशर टेम्पो वाहन क्रमांक – जी.जे. ०१ जेटी- ५७९२ अवघड वळणावर चालकाचा ताबा सुटल्याने अपघात झाला. हा टेम्पो अहमदाबाद येथील महेंद्र चंद्रा यांचे नावे असून त्यांनी गुजरात येथील फेवा पटेल यांना विकला आहे. या टेम्पोत गोवा बनावटीची ८ लाख ७८ हजार ४०० रुपयांची दारु आढळली आहे. तसेच १० लाख रुपयांचा टेम्पो मिळून १८ लाखांचा मुद्देमाल पोलिसांनी ताब्यात घेत चालकाविरुद्ध गुन्हा दाखल केला आहे. टेम्पोतून गोवा बनावटीच्या दारूच रस्त्यावर पडल्याने तळीरामांची चांगलीच दिवाळी झाली.

याबाबत सविस्तर वृत्त असे की, ज्या टेम्पोला अपघात झाला त्यात गोवा बनावटीच्या दारु होती. दारु बाटल्यांचा खच रस्त्यावर पडलेला होता. अपघात होताच टेम्पो चालकाने तेथून पळ काढला. नडगिवे येथे पलटी झाल्याची बातमी वाऱ्यासारखी बुधवारी रात्री सर्वत्र समजताच अपघातस्थळी खच पडलेल्या दारूच्या बाटल्यावर काहींनी रातोरात हात मारला, आणि त्यांची दिवाळी झाली.

त्यानंतर खारेपाटण पोलीस स्टेशनचे पोलीस उद्धव साबळे, पराग मोहिते, चेतन राणे, भालचंद्र तीवरेकर तातडीने घटनास्थळी दाखल होत पंचनामा केला. आयशर टेम्पो व गोवा बनावटीच्या दारुचा सुमारे ८ लाख ७८ हजार ४०० रुपये किमतीचा माल आढळून आला. वाहन आणि गोवा बनावटीचा माल जप्त करण्यात आला आहे. या अपघातानंतर पोलीस उपनिरीक्षक श्री देठे यांनी घटनास्थळी भेट दिली.