🟥 संत गाडगेबाबा भाजी मंडईच्या नूतन इमारती बाबत मंत्री केसरकरांनी परस्पर निर्णय घेवू नयेत ; राजन तेली

_*🎥 Kokan Live Breaking News*_

*✍️ ब्युरो न्यूज : कोकण लाईव्ह ब्रेकिंग*

*🎴सावंतवाडी, दि-१४:-* सावंतवाडी शहराच्या विकासासाठी सावंतवाडीकर नागरिकांनी नगरपालिकेची सत्ता भाजपच्या ताब्यात दिली होती. त्यावेळी भाजपच्या नगराध्यक्षांनीच भाजी मंडईचा प्रस्ताव मंजूर करून घेतला होता. त्यामूळे भाजी मंडईसंदर्भात कोणताही निर्णय घेताना स्थानिक आमदार दीपक केसरकर यांनी भाजपच्या लोकप्रतिनिधींना विश्वासात घेणे आवश्यक आहे. राज्यात शिंदे व फडणवीस यांच्या नेतृत्वात सत्ता आहे. केसरकर जरी आमदार असले तरीही पालकमंत्री भाजपचे आहेत याचा विसर त्यांना पडू नये, असा सल्ला भाजपचे जिल्हाध्यक्ष राजन दिला.

सावंतवाडी शहरातील संत गाडगेबाबा भाजी मंडईच्या नूतन इमारतीच्या प्रक्रियेमध्ये बैठक घेताना मंत्री दीपक केसरकर यांनी नगरपालिकेतील भाजपच्या माजी लोकप्रतिनिधींना विश्वासात घेतले नाही. तसेच या इमारतीच्या भूमिपूजनाबाबत मंत्री दीपक केसरकर आग्रही असल्याचे दिसून आले होते. सदर इमारतीचे भूमिपूजन करण्यापूर्वी तेथील व्यापाऱ्यांचे योग्य पुनर्वसन करणे आवश्यक असल्याची भूमिका माजी नगराध्यक्ष संजू परब यांनी घेतली होती. तसेच दोन दिवसांपूर्वीच सावंतवाडीचा मोती तलावा काठी असलेला आठवडा बाजार जिल्हाधिकाऱ्यांमार्फत होळीच्या खुंटावर हलविण्यात येईल असे वक्तव्य केसरकर यांनी केले होते. या पार्श्वभूमीवर राजन तेली यांनी आपली भूमिका मांडली. सावंतवाडीतील भाजप कार्यालयात आयोजित पत्रकार परिषदेत ते बोलत होते. यावेळी भाजपा जिल्हा प्रवक्ते माजी नगराध्यक्ष संजू परब, बांदा मंडल अध्यक्ष महेश धुरी, आंबोली मंडल अध्यक्ष रवी मडगावकर, शहर मंडल अध्यक्ष अजय गोंदावळे, माजी नगरसेवक तथा जिल्हा चिटणीस मनोज नाईक, माजी नगरसेवक आनंद नेवगी आदी उपस्थित होते.

आठवडा बाजाराच्या जागेसंदर्भातील निर्णय हा स्थानिक व्यापारी, ग्रामीण भागातील शेतकरी व सावंतवाडीकर नागरिक या सर्वांशी विचार विनिमय करून घेणे गरजेचे आहे. भारतीय जनता पार्टी जनतेसोबत असून जनतेच्या भूमिकेशी आम्ही ठाम आहोत. त्यामुळे लोकांच्या सोयीची जागा असणे ही अत्यावश्यक बाब आहे. यासाठी जिल्हाधिकाऱ्यांनी लोकांच्या भावनांचा विचार करूनच निर्णय घ्यावा व तो सर्व मान्य असावा, अशी स्पष्ट भूमिका भाजप जिल्हाध्यक्ष राजन तेली यांनी व्यक्त केली. भाजी मंडईतील व्यापाऱ्यांचे योग्य जागी पुनर्वसन व्हावे तसेच कोणत्याही व्यापाऱ्यावर अन्याय होऊ नये यासाठी भाजप सुरुवातीपासूनच आग्रही आहे. त्यामुळे केसरकरांनी याबाबत परस्पर निर्णय घेऊ नये. वेळ पडल्यास याबाबत केसरकर यांनी पुढाकार घ्यावा आम्ही त्यांच्या सोबत आहोत. एकत्र बैठक घेऊन स्थानिक व्यापाऱ्यांच्या पुनर्वसनासाठी प्रयत्न करूया, अशी मागणी ही यावेळी राजन तेली यांनी केली. तर आपण नगराध्यक्ष असताना उभा बाजार येथे नागरिकांना अडचण होत असल्याने व स्थानिक व्यापाऱ्यांच्या मागणीनुसार आठवडा बाजार मोती तलावाच्या काठावर आणण्याचा निर्णय घेण्यात आला होता. आजही बाजार आहे तिथेच राहावा ही लोकांची मागणी आहे. त्यामुळे जनतेच्या मागणी सोबत आम्ही ठाम आहोत, अशी भूमिका यावेळी माजी नगराध्यक्ष संजू परब यांनी व्यक्त केली.