🛑 नियोजनबद्ध व पारदर्शक कामामुळे जिल्ह्यात करूळ सोसायटीचा कारभार आदर्शवत..

*🎥 कोकण लाईव्ह ब्रेकिंग न्यूज*

_अचूक बातमी थेट हल्ला_

*✍️ प्रतिनिधी : संजय शेळके*

*🎴वैभववाडी, दि-०४ :-* नियोजनबद्ध व पारदर्शक कामामुळे जिल्ह्यात करूळ सोसायटीचा कारभार आदर्शवत राहिला आहे. या सोसायटीचा प्रगतीचा आलेख दर वर्षी चढता राहिला आहे. शेतकरी केंद्रबिंदू मानून सोसायटीचे कामकाज सुरू आहे. या पुढे देखील शेती व उद्योगधंद्यांना सर्वतोपरी सहकार्य केले जाईल. तसेच चालू वर्षी संस्था सभासदांना 10 टक्के डिव्हीडंटचे वाटप करण्यात येणार आहे. अशी माहिती संस्थेचे व्हा. चेअरमन रवींद्र पवार यांनी दिली.

करुळ येथील श्री. केदारलिंग विकास कार्यकारी सहकारी सेवा सोसायटी या संस्थेची 61 वी वार्षिक सर्वसाधारण सभा व्हाइस चेअरमन रवींद्र पवार यांच्या अध्यक्षतेखाली पार पडली. यावेळी संचालक बबन डकरे, सुभाष पाटील, हिराचंद कोलते, संतोष शिंदे, माजी सरपंच हिंदुराव पाटील, बबन सावंत, दत्ताराम साटम, बाळा कदम, दाजी कोलते, अनंत कदम, सौ सावंत, यशवंत कोलते, सचिव रामकृष्ण कोलते, अनंत कोलते तसेच सभासद मोठ्या संख्येने उपस्थित होते.

सभेच्या सुरुवातीला मयत सभासदांना श्रद्धांजली वाहण्यात आली. तसेच दहावी शालांत परीक्षेत यश संपादन केलेल्या विद्यार्थिनींचा सभेत गुणगौरव करण्यात आला. यावेळी संस्था सचिव रामकृष्ण कोलते यांनी संस्थेच्या मुख्य विभाग, धान्य विभाग व ग्राहक भांडार या तीनही विभागाचा अहवाल सभेत वाचून दाखवला. संस्थेची एकूण सभासद संख्या 967 इतकी आहे. चालू वर्षात संस्थेला 11 लाख 66 हजार 860 इतका नफा झाला आहे. संस्थेचे सभासद शेअर्स भागभांडवल 41 लाख 65 हजार 548 इतके आहे. संस्थेने 1 कोटी 56 लाख 87 हजार 959 इतके एकुण कर्जवाटप केले आहे. चालू वर्षी सभासदांना दहा टक्के लाभांश देण्यात येणार आहे. त्याची रक्कम 4 लाख 16 हजार 548 इतकी आहे. अशी माहिती सचिव रामकृष्ण कोलते यांनी दिली. संस्थेने बँकेकडून कर्ज स्वरूपात घेतलेली रक्कम 100% वसूल करून परतफेड केलेली आहे. चालू वर्षात संस्थेला मुख्य विभागाकडून 2 लाख 83 हजार 499, धान्य विभागाकडून 1 लाख 61 हजार 137, तर ग्राहक भांडार विभागाकडून 23 हजार 216 इतका नफा झालेला आहे.

संस्थेचा एकूण कर्ज व्यवहार 1 कोटी 56 लाख 87 हजार 959 रुपये. त्यामध्ये अल्पमुदत व आंबा, काजू पिक कर्ज – 43 लाख 86 हजार 644, मध्यम व दीर्घ मुदत कर्ज – 94 लाख 78 हजार 413, शेतीपूरक कर्ज – 10 लाख 23 हजार 079, अल्पमुदत स्व: फंड- 35 हजार, मध्यम मुदत स्व: फंड- 7 लाख 64 हजार 823, आदी रक्कम कर्ज स्वरूपात शेतकऱ्यांना पुरविण्यात आलेली आहे. अशी माहिती सचिव श्री. कोलते यांनी दिली. संस्थेच्या कारभाराबाबत उपस्थित सभासदांनी समाधान व्यक्त केले.

फोटो – करूळ येथे सोसायटीच्या सर्वसाधारण सभेत गुणवंत विद्यार्थ्यांचा सत्कार करताना संस्था पदाधिकारी व इतर.