🛑 आबासाहेब तोरसकर ; ध्येयवेडा शैक्षणिक पुराणवृक्ष..

🎥 कोकण लाईव्ह ब्रेकिंग न्यूज
अचूक बातमी थेट हल्ला

✍️ प्रतिनिधी : संजय भाईप

🎴सावंतवाडी, दि-०६ :- धी बांदा नवभारत शिक्षण प्रसारक मंडळाचे कार्याध्यक्ष तथा शिक्षण महर्षी मा. प्रतापराव राघोबा तोरसकर तथा आबासाहेब तोरसकर यांचे वयाच्या ८६ व्या वर्षी मुंबई-माहिम येथे निधन झाल्याची अनपेक्षित बातमी ऐकून धक्का बसला. सावंतवाडी, दोडामार्ग तालुक्यातील ग्रामीण भागातील शिक्षण क्षेत्रातील एक ध्येयवेडा शैक्षणिक पुराणवृक्ष कोसळला गेला याची खंत माझ्या मनाला आजही वाटते आहे. शिक्षण क्षेत्रात झपाटून काम करणाऱ्या एका ध्येय वेड्या मार्गदर्शकास आम्ही कायमस्वरूपी मुकलो आहोत.
मा. आबासाहेब तोरसकर व डॉ. विठ्ठलराव तोरसकर घराण्यातील सर्वाचे डेगवे ग्रामस्थ हितवर्धक संघावर नेहमीच सौहार्दपूर्ण संबंध होते व आजही आहेत. त्यामुळे संस्थेच्या प्रत्येक कार्यात आबासाहेबाचे मार्गदर्शन व सहकार्य संस्थेला नेहमी लाभले आहे. संस्थेचा रौप्य महोत्सव मुंबईत साजरा करण्याचा संस्था सरचिटणीस स्व.शांताराम शिवराम देसाई व तत्कालीन कार्यकारीणीने व सर्व सभासदांनी ठरविले. त्याकरीता स्मरणिका प्रकाशित करण्याचे ठरले. त्याकरीता जाहिराती गोळा करण्यात आल्या. त्यावेळी आबासाहेब तोरसकर यांनी बहुमोल असे सहकार्य संस्थेला दिले होते. अलीकडे ४-५ वर्षापूर्वी संस्थेच्या वार्षिक स्नेहसंमेलनात उपस्थित राहून मार्गदर्शन केले होते.
सन १९८३ ची गोष्ट. डेगवे ग्रामस्थ हितवर्धक संघाने डेगवे गावात समाज मंदिर बांधण्याचा संकल्प केला. त्यावेळी संस्थेचे सरचिटणीस स्व. शांताराम देसाई, शंभा देसाई, हरीश्चद्र देसाई व मी त्यांच्या मुंबईतील घरी गेलो. त्यावेळी त्यांची प्रत्यक्ष माझी भेट झाली. त्या भेटीनंतर मैत्री झाली. सामाजिक व शैक्षणिक क्षेत्रात त्यांचे काम वाखाणण्याजोगे होते. हे जवळून पाहण्याचा योग मला नुकताच आला होता. अनेक संस्थात त्यांनी काम केले आहे. त्यामुळे त्या सुद्धा नावारूपाला आल्या आहेत.
सावंतवाडी संस्थान मराठा समाज,मुंबई या संस्थेच्या कार्यकारी मंडळावर १९९२-९३ मध्ये त्यांच्या सोबत काम करण्याचा मला योग आला होता. शिवाजी नाट्य मंदिरच्या अध्यक्ष पदावरही त्यांनी काम केले आहे. त्यांना विविध क्षेत्रात पुरस्कारही प्राप्त झाले आहेत.
सिंधुदुर्ग जिल्ह्यातील सावंतवाडी, दोडामार्ग तालुक्यातील ग्रामीण भागात शिक्षण प्रसाराचे महत्त्वाचे कार्य त्यांनी केले. त्यामुळे आज किती तरी विद्यार्थ्यांनी आपापल्या क्षेत्रात नाव लौकिक संपादन केले आहेत. आबासाहेब म्हणजे व्यवस्थापनाचे चालते बोलते विद्यापीठच होते. प्रत्येक कार्यक्रमांचे त्यांचे नियोजन तंतोतंत असे. चालढकलपणा त्यांना आवडत नव्हता. ठरलेल्या दिवशी व त्या वेळेतच नियोजित काम झाले पाहिजे असा त्यांचा आग्रह असे.
शिक्षण क्षेत्रात नाविन्यपूर्ण अभ्यास करून आपल्या संस्थांच्या शाळेत इंग्रजी शिक्षण राबवणे हा त्यांचा एक ध्यास होता. हे मी जवळून पाहिले होते. अनुभव घेत होतो. २५ दिवसापूर्वी त्यांच्याशी दुरध्वनीवर संपर्क साधला होता. त्यांनी माझ्या तब्येतीची आस्थेने चौकशी केली होती.आबासाहेब तोरसकर स्वभावाने बाहेरून काटेरी वाटले तरी मनाने फार हळवे होते. रसाळ फणसासारखे होते.
अशा या शिक्षण महर्षीने अखेरचा श्वास मुंबईत घेऊन शिक्षण क्षेत्रातील मान्यवरांना चटका लावून गेले.
समस्त डेगवे ग्रामस्थातर्फे मी त्यांना भावपूर्ण श्रद्धांजली अर्पण करीत आहे. मृतात्म्यास शांती लाभो ही परमेश्वर चरणीं प्रार्थना.