🛑 दुटप्पी भूमिका घेणाऱ्या ठाकरे सरकारचा जाहीर निषेधाचे भाजपा महिला मोर्चाच्या वतीने वैभववाडी पोलीस निरीक्षक यांना निवेदन..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : संजय शेळके

🎴वैभववाडी, दि-२७ :- स्वतःच्या पक्षातील नेत्यांसाठी एक न्याय व विरोधी पक्षाच्या नेत्यांसाठी वेगळा न्याय. अशी दुटप्पी भूमिका घेणाऱ्या ठाकरे सरकारचा जाहीर निषेध करत असल्याचे निवेदन वैभववाडी भाजपा महिला मोर्चाच्या वतीने पोलीस ठाण्यात देण्यात आले आहे. केंद्रीय मंत्री नारायण राणे यांच्या विरोधात प्रक्षोभक विधान करणाऱ्या शिवसेनेच्या त्या दोन आमदारांच्या मुसक्या आवळा असेही निवेदनात म्हटले आहे.

ठाकरे सरकारने केंद्रीय मंत्री नारायण राणे यांना लोकशाही मूल्ये पायदळी तुडवत अटक केली होती. ही घटना अत्यंत निंदनीय असून सुडबुद्धीची आहे. समाजात तेढ निर्माण करणारी व नेत्यांच्या जिव्हारी लागणारी अशी विधाने यापूर्वी संबंधित पक्षाच्या नेत्यांकडून करण्यात आलेली आहेत. केंद्रीय मंत्री नारायण राणे यांच्या विरुद्ध शिवसेनेचे हिंगोली आमदार संतोष बांगर आणि बुलढाणा आमदार संजय गायकवाड यांनी जे विधान केले त्या वक्तव्याची क्लिप समाज माध्यमात प्रसारित झालेली आहे. घरात घुसून कोथळा बाहेर काढण्याची धमकी त्यांनी दिली आहे. त्यांच्यावर सुद्धा गुन्हा नोंद करून कारवाई करा असे निवेदनात म्हटले आहे. गृह विभाग व राज्य सरकारने त्यांच्यावर कारवाई न केल्यास पुढे होणाऱ्या जनक्षोभाची जबाबदारी ही आमची नसेल. असे निवेदनात म्हटले आहे. वैभववाडी पोलीस निरीक्षक अतुल जाधव यांच्याकडे निवेदन सादर केले आहे. निवेदन देतेवेळी भाजपा तालुकाध्यक्ष नासीर काझी, महिला मोर्चा तालुकाध्यक्ष प्राची तावडे, सभापती अक्षता डाफळे, माजी सभापती शारदा कांबळे, माजी सभापती शुभांगी पवार, विद्या पाटील, बंड्या मांजरेकर, प्रदिप नारकर व कार्यकर्ते उपस्थित होते.