🛑 कथा इन्सुली गावच्या राणे कुटुंबीयांची..गाथा उत्कर्ष युवक मंडळाच्या शौर्याची..

🛑 कायम संकट काळी मदतीला धावून येणाऱ्या उत्कर्ष मंडळाचा इतिहास विस्मरणीय..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : अंकुश नाईक

🎴सावंतवाडी, दि-२७ :- सिंधुदुर्ग जिल्ह्यात-सावंतवाडी तालुक्यातील इन्सुली गावात गुरु पौर्णिमेच्या दिवशी पहाटेच तेरोखोल नदीने धोक्याची पातळी ओलांडली, पहाटेचे ५ वाजलेले राणे कुटुंबीयांनी उंबरठ्यापर्यंत पाणी आलेले बघितले आणि संपूर्ण कुटुंबाची तारांबळ उडाली.जशी-जशी पहाट ओसरत सकाळ झाली तशी-तशी पाण्याची पातळी वाढू लागली,ओहोळापलीकडचे एकच घर, घरापर्यंत जाण्यासाठी ओहोळातुन बांधलेला साकव दिसेनासा झाला,घराच्या सभोवताली अंदाजे १५ फुटांपर्यंत पाणीच पाणी,बाहेर पडण्यास मार्गच नाही,राणे कुटुंबाच्या घरात पाणी घुसण्यास सुरुवात झाली,एकाच घरात १६ माणसं आणि त्यात १ वर्षाचं बाळ,संपूर्ण कुटुंब भयभीत झाले शेवटी गेल्याच वर्षी घरात बनवलेल्या पोटमाळ्याचा आसरा संपूर्ण कुटुंबाने घ्यायचं ठरवलं आणि काही महत्वाची कागदपत्रे घेऊन १६ ही जणं वर माळ्यावर गेली,पाण्याचा जोर काही कमी होताना दिसत नव्हता,बघता-बघता संपूर्ण घर पाण्यात बुडु लागले,मदतीसाठी कोणाला फोन करायचा तर मोबाईल चा नेटवर्क गायब,आरडाओरडा करुनही कोणाला आवाज पोहोचणार नाही एवढ्या अंतरावरचे घर,सकाळचे‌ ९ वाजलेले आता मात्र पुराचे पाणी वाढु लागले होते,संपूर्ण घरात पाणी भरले,बघता बघता सगळा संसार वाहु लागला,घरातील विद्युत उपकरणे पाण्याखाली गेली आता मात्र राणे कुटुंबीयांचा अश्रुचा बांध फुटला होता.घरातील सगळा संसार उद्धवस्त करुन पाणी सर्वजन वर बसलेल्या माळ्यापर्यंत वाढु लागले होते.दुसरीकडे गावात सगळीकडे राणे कुटुंब पाण्यात अडकल्याची बातमी पसरली.उत्कर्ष युवक मंडळाला बातमी समजताच मंडळाचे सर्व ‌कार्यकर्ते एकवटले क्षणाचाही विलंब न करता मंडळाची टीम सावंतवाडी येथे बोटीच्या उपलब्धतेसाठी पोहचली परंतु बोट अथवा‌ होडी काही मिळेना शेवटी मंडळाने ड्रम बोट आणि लाईफ जॅकेट घेऊन जायचा निर्धार केला आणि टीम गावात ‌पोचली,साद घालुन हाक सुद्धा पोचणार नाही एवढ्या अंतरावरच्या राणे कुटुंबीयांच्या घरापर्यंत जाण्यासाठी उत्कर्ष युवक मंडळाची तरुण पोरं तयार झाली, घराभोवती १५ फुटांपर्यंत पाणीच पाणी भरलेले, तिथल्या जागेची रितसर माहिती सुद्धा नव्हती,ड्रम बोट घेऊन पोचण्यासाठी कमीत-कमी १५० मीटरचं अंतर,काहींना तर पोहता‌‌ सुद्धा येत नव्हते परंतु ‌लाईफ जॅकेटच्या भरवशावर या तरुणांनी जायचा निर्धार केला,उद्देश एकच होता राणे कुटुंबीयांना‌ कशाही परिस्थितीत वाचवायचं,स्वतःच्या जीवाची बाजी लावत ५ ते ६ तरुण बोटीवर बसुन निघाले,घरातील १६ माणसांना एकावेळी आणणे‌‌ तर शक्य नव्हते,मग ४ फेरी तरी मारावी लागणार होती, परंतु काही का होईना या जिद्दीने हे तरुण निघाले,घरापर्यंत पोहोचले तर परिस्थिती खुपचं गंभीर झालेली होती, सोळाही माणसं पोटमाळ्यावर बसुन होती,उत्कर्ष युवक मंडळाची बोट बघितल्यावर राणे कुटुंबीयांनी सुटकेचा निःश्वास टाकला,मंडळाने धीर देत त्याच कुटुंबाकडून जवळचा रस्ता शोधत त्यातील काही जणांना सुखरूप बाहेर काढले,आता मात्र खरी परीक्षा होती ती त्या लहान १ वर्षाच्या बाळाला ‌सुरक्षीत स्थळी नेण्याची,ग्रामदेवता माऊली देवीच्या कृपेने ‌पावसाचा जोर ओसरला होता,मंडळाच्या तरुणांनी अगदी काळजीपूर्वक त्या बाळाला तिच्या आईसोबत सुरक्षित नेले आणि सगळीकडे ताळ्यांचा गडगडाट झाला.उत्कर्ष युवक मंडळाने कुठलीही शासकीय वा आधुनिक सुविधा नसताना संपूर्ण कुटुंबाला एका साध्या ड्रम बोटीच्या सहाय्याने वाचवलं याचं समाधान प्रत्येक मंडळाच्या कार्यकर्त्याच्या आणि गावातील उपस्थितांच्या चेह-यावर दिसुन येत होतं.इतरांसाठी काहीही असो पण राणे कुटुंबीयांसाठी हा उत्कर्ष युवक मंडळाने रचलेला इतिहास असेल.