राज्यात पावसाचे आगमन झाल्याने बळीराजा सुखावला!

🛑राज्यात शेतीच्या कामांना जोर 

🛑राज्यात पावसाचा जोर १७ जुलैपर्यंत कायम असल्याचा कृषी हवामानाचा अंदाज

🎥कोकण लाईव्ह ब्रेकिंग न्यूज
अचूक बातमी थेट हल्ला

✍️प्रतिनिधी : सुर्यकांत जाधव

🎴पुणे : दि .१४ : राज्यात पावसाचे आगमन झाल्याने शेतकरी सुखावला असून, पेरण्यांनी जोर धरला आहे. आतापर्यंत सुमारे ७० टक्के पेरण्यांची कामे पूर्ण झाली असून, सर्वाधिक पेरण्या या लातूर विभागात करण्यात आल्या आहेत.

कोकण विभागात खरीपाचे ४.४२ लाख हेक्टर क्षेत्र असून, त्यापैकी ०.९८ लाख हेक्टर म्हणजे सुमारे २२.१७ टक्के क्षेत्रावर पेरणी झाली आहे. कोकणासह राज्याच्या विविध भागांत १७ जुलैपर्यंत पावसाची शक्यता असल्याने पेरणी केलेल्या पिकांमध्ये पाणी साचणार नाही, याची दक्षता घेण्याच्या सूचना कृषी हवामान विभागाने दिल्या आहेत.

राज्यात खरीपाचे १५१.३३ हेक्टर क्षेत्रफळ आहे. त्यापैकी आतापर्यंत १०५.९६ हेक्टर क्षेत्रावर, म्हणजे सुमारे ७० टक्के पेरण्या झाल्या आहेत. ज्वारी, बाजरी, मका, भुईमूग, सूर्यफूल, मूग, सोयाबीन, कापूस, तूर,उडीद, तीळ आदी पिकांच्या पेरण्या झाल्या आहेत. राज्यात कोकण विभागात जोरदार पाऊस आहे.

पुणे, कोल्हापूर आणि नाशिक विभागांमध्ये हलक्या आणि मध्यम स्वरूपाचा पाऊस पडत आहे.औरंगाबाद, लातूर, अमरावती आणि नागपूर विभागांमध्येही तुरळक पाऊस पडत आहे. राज्यात पावसाचा जोर १७ जुलैपर्यंत कायम राहणार असल्याचा अंदाज कृषी हवामान खात्याने वर्तविला आहे. त्या दृष्टीने खबरदारी घेण्याच्या सूचना देण्यात आल्या आहेत. पेरणी केलेली पिके, फळबागा आणि भाजीपाला या पिकांमध्ये पाणी साचणार नाही याची दक्षता घ्यावी, पीक संरक्षणासाठी फवारणी करणे, आंतरमशागत आणि तणनियंत्रणाची कामे पुढे ढकलण्याच्याही सूचना कृषी हवामान खात्याने दिल्या आहेत.

पुणे विभागात ८.६७ लाख हेक्टर खरीपाचे क्षेत्रफळ असून, आतापर्यंत सुमारे ७४ टक्के क्षेत्रावर पेरण्या झाल्या आहेत. या परिसरात पेरणीयोग्य पाऊस झाला असल्याने सोयाबीन आणि तूर या पिकांची पेरणी करण्याचा सल्ला देण्यात आला आहे. भात रोपाची लागवड ही पाऊस झाल्यानंतरच करण्याचे सुचविण्यात आले आहे.

कोल्हापूर विभागामध्ये खरीपाचे क्षेत्र हे ८.०३ लाख हेक्टर असून, सुमारे ८४ टक्के पेरणीची कामे पूर्ण झाली आहेत. या विभागात भात आणि नाचणी या पिकांची लागवड करण्याच्या सूचना देण्यात आल्या आहेत.

नाशिक विभागात २१.१९ लाख हेक्टर खरीपाचे क्षेत्र असून, ५३ टक्के क्षेत्रफळावरील पेरण्या पूर्ण झाल्या आहेत. या विभागातही पावसाची शक्यता असल्याने भातरोपांची पुनर्लागवड करण्याचा सल्ला कृषी हवामान खात्याने दिला आहे.

औरंगाबाद विभागामध्ये असलेल्या सुमारे २० लाख हेक्टर खरीपाच्या क्षेत्रापैकी सुमारे ८६ टक्के क्षेत्रावर पेरणी करण्यात आली आहे. या परिसरात सोयाबीन, टोमॅटो, मिरची आणि वांगी या पिकांची लागवड करण्याचे कृषी हवामान खात्याने सुचविले आहे.

लातूर विभागामध्ये असलेल्या २७ लाख हेक्टर खरीपाच्या क्षेत्रापैकी सुमारे ८७ टक्के क्षेत्रावर शेतकऱ्यांनी पेरण्या केल्या आहेत.

अमरावती विभागामध्ये ३२.२४ लाख हेक्टर खरीपाच्या क्षेत्रापैकी सुमारे ८२ टक्के क्षेत्रावर पेरणीची कामे झाली आहेत. या भागात पुढील पाच दिवसांत पावसाची शक्यता असल्याने सोयाबीन, कापूस आणि तूर या पिकांची पेरणी करावी. मात्र, मूग आणि उडीद या पिकांची पेरणी करू नये, असा सल्ला देण्यात आला आहे.

नागपूर विभागामध्ये असलेल्या सुमारे १९ लाख हेक्टर क्षेत्रफळापैकी सुमारे ५९ टक्के क्षेत्रावर शेतकऱ्यांनी पेरणीची कामे पूर्ण केली असल्याची माहिती कृषी विभागाकडून देण्यात आली.