🛑 पाडलोसमध्ये तिलारी कालव्याचे अधिकारी धारेवर..

🛑 नुकसानग्रस्त शेतकऱ्यावर उपासमारीची वेळ ..

🎥 कोकण लाईव्ह ब्रेकिंग न्यूज

अचूक बातमी थेट हल्ला

✍️ प्रतिनिधी : शैलेश गवस

🎴बांदा, दि-१७ :- पाण्याच्या प्रवाहाची भौगोलिक परिस्थिती अधिकाऱ्यांना सांगूनही दुर्लक्ष केल्यामुळे वर्षभरासाठी लागणाऱ्या पोटगीला आम्हाला मुकावे लागणार आहे. केवळ अधिकाऱ्यांच्या बेजबाबदारपणामुळेच आपल्या शेतजमिनीचे नुकसान झाले आहे. त्यामुळे जाणूनबुजून केलेल्या नुकसानीची भरपाई आम्हाला तात्काळ द्यावी अन्यथा आम्ही सहकुटुंब याच ठिकाणी चिखलात बसून उपोषण करणार असल्याचा इशारा शेतकरी राजू माधव यांनी तिलारी कालव्याचे कनिष्ठ अभियंता महेंद्र डांबरेकर यांना दिला. तर झालेले नुकसान मान्य करत नुकसानग्रस्त शेतकऱ्याना भरपाई देण्यासाठी प्रयत्न करणार असल्याचे श्री.डांबरेकर यांनी सांगितले.

तिलारी पाटबंधारे अधिकाऱ्यांच्या अनास्थेपोटी पाडलोस मधील शेतकरी राजू माधव यांची शेतजमीन कालव्यात कोसळली. अधिकारी वारंवार आश्वासन देत असून प्रत्यक्षात कार्यवाही करत नसल्यामुळे चिखलात बसून आंदोलन करण्याचा इशारा राजू माधव यांनी दिला होता. याची दखल घेत तिलारी पाट बंधारा कालव्याचे कनिष्ठ अभियंता महेंद्र डांबरेकर, स्थापत्य सहाय्यक प्रवीण पेडणेकर, ठेकेदार आदींनी घटनास्थळी भेट देत पाहणी केली. या वेळी शेतकरी राजू माधव आक्रमक झाले.

तौक्ते चक्रीवादळात सदर जमीन वाहून गेल्याचे पाहणी केल्यानंतर अधिकाऱ्यांनी सांगितले. परंतु राजू माधव यांनी सदर अंदाज खोडून काढला तसेच पावसाळ्यापूर्वी पाण्याचा अंदाज अधिकाऱ्यांना देऊनही बेजबाबदारपणामुळे दुर्लक्ष केले गेले. त्यामुळे चक्रीवादळाच्या यादीत आपले नाव समाविष्ट करून भरपाईसाठी ताटकळत ठेवू नका. तुम्हा अधिकाऱ्यांच्या बेजबाबदारपणामुळेच माझ्या शेतजमिनीचे नुकसान झाले, असे सांगत आक्रमक भूमिका घेतली. शेतकऱ्याचा आक्रमकपणा पाहून अधिकाऱ्यांनी नरमाईची भूमिका घेत झालेले नुकसान मान्य केले. तसेच दोन दिवसांत वरिष्ठ अधिकाऱ्यांना प्रत्यक्ष घटनास्थळी बोलावून भरपाईचा निर्णय देऊ असे आश्वासन कनिष्ठ अभियंता महेंद्र डांबरेकर यांनी शेतकरी राजू माधव यांना दिले.

एकंदरीत, शेतकरी राजू माधव यांना भरपाई मिळते की पुन्हा एकदा आश्वासन मिळते याकडे समस्त शेतकऱ्यांचे लक्ष लागून राहिले आहे. तर भरपाई न मिळाल्यास चिखलात उपोषण आंदोलन करण्याच्या निर्णयावर ठाम असल्याचे राजू माधव म्हणाले.