🛑 सावंतवाडी पंचायत समितीच्या रखडलेल्या प्रशासकीय इमारतीचा मार्ग मोकळा!

*🛑 इमारत निर्लेखित; निविदा व करारनामा प्रक्रिया पूर्ण — दोन दिवसांत कार्यारंभ आदेश, लवकरच भूमिपूजन*

*🎥 KOKAN LIVE BREAKING ||NEWS CHANNEL*

*✍ ब्युरो न्यूज : कोकण लाईव्ह ब्रेकिंग*

*🎴सावंतवाडी, दि-१३ ::-* सावंतवाडी पंचायत समितीच्या बहुप्रतीक्षित प्रशासकीय इमारतीचे रखडलेले काम अखेर मार्गी लागण्याच्या टप्प्यावर आले आहे. जुन्या इमारतीचे निर्लेखन न झाल्याने प्रत्यक्ष बांधकामाला सुरुवात करण्यास अडथळा निर्माण झाला होता. अखेर प्रशासनाने ही इमारत निर्लेखित केल्याने नव्या इमारतीच्या बांधकामाचा मार्ग मोकळा झाला आहे.
सुमारे ८ कोटी रुपये खर्चाच्या पंचायत समितीच्या प्रशासकीय इमारतीच्या बांधकामासाठी निविदा प्रक्रिया पूर्ण झाली असून मनन कन्स्ट्रक्शन, सांगली यांच्या नावाने निविदा मंजूर करण्यात आली आहे. संबंधित कंत्राटदारासोबतचा करारनामा पूर्ण झाला आहे.
आता प्रशासनाकडून येत्या दोन दिवसांत कामाचा कार्यारंभ आदेश देण्यात येणार असून, त्यानंतर प्रत्यक्ष बांधकाम सुरू होण्याचा मार्ग खुला झाला आहे. पुढील काही दिवसांत या कामाचे भूमिपूजन करून प्रत्यक्ष बांधकामाला सुरुवात होण्याची शक्यता आहे.
दरम्यान, पंचायत समितीच्या इमारतीचा प्रश्न अनेक दिवसांपासून रखडला होता. जुन्या इमारतीचे निर्लेखन रखडल्यामुळे निविदा प्रक्रिया पूर्ण होऊनही प्रत्यक्ष काम सुरू करता येत नव्हते. त्यामुळे नागरिकांमध्ये तसेच पंचायत समितीच्या पदाधिकारी आणि कर्मचाऱ्यांमध्येही नाराजी होती.
आमसभेत हा प्रश्न उपस्थित होण्याची शक्यता लक्षात घेऊन प्रशासनाने हालचाली गतिमान केल्याची चर्चा पंचायत समिती परिसरात सुरू आहे. अखेर जुन्या इमारतीच्या निर्लेखनाची प्रक्रिया पूर्ण झाल्याने या अडथळ्यावर पडदा पडला आहे.
या प्रशासकीय इमारतीसाठी पालकमंत्री आणि स्थानिक आमदार दीपक केसरकर यांच्या प्रयत्नातून निधी मंजूर झाला आहे. आधुनिक व सुसज्ज प्रशासकीय इमारत उभी राहिल्यानंतर पंचायत समितीच्या विविध विभागांना अधिक चांगल्या सुविधा उपलब्ध होणार असून नागरिकांचीही मोठी गैरसोय दूर होणार आहे.
आमदार दीपक केसरकर यांनीही या कामाबाबत माहिती देताना निविदा, आणि करारनामा यासंबंधीची प्रक्रिया पूर्ण झाल्याचे सांगितले असून, दोन दिवसांत कार्यारंभ आदेश मिळतील, अशी माहिती दिली आहे.
*रखडलेपणाला अखेर पूर्णविराम!*
वर्षानुवर्षे जुन्या इमारतीच्या प्रश्नात अडकलेल्या पंचायत समितीच्या नव्या प्रशासकीय इमारतीचे काम आता प्रत्यक्ष मार्गावर आले आहे. कागदोपत्री प्रक्रिया पूर्ण झाल्यानंतर आता प्रशासनासमोर केवळ आदेश आणि प्रत्यक्ष काम सुरू करण्याचे पाऊल उरले आहे. त्यामुळे सावंतवाडीकरांचे लक्ष आता भूमिपूजन कधी आणि प्रत्यक्ष बांधकामाला सुरुवात कधी होते, याकडे लागले आहे.
८ कोटींच्या या महत्त्वाकांक्षी प्रकल्पाचे काम वेळेत आणि दर्जेदार पद्धतीने पूर्ण झाले, तर सावंतवाडी पंचायत समितीला अखेर सुसज्ज प्रशासकीय छत मिळणार आहे.