🛑 अभिनव फाऊंडेशन सिंधुदुर्गच्या अध्यक्षपदी किशोर चिटणीस

🛑 नवीन पदाधिकाऱ्यांची निवड; सामाजिक, शैक्षणिक व आरोग्यविषयक उपक्रमांना नवसंजीवनी देण्याचा निर्धार

🎥 KOKAN LIVE BREAKING ||NEWS CHANNEL

✍ ब्युरो न्यूज : कोकण लाईव्ह ब्रेकिंग

🎴सावंतवाडी, दि-२८:- अभिनव फाऊंडेशन सिंधुदुर्गच्या अध्यक्षपदी किशोर चिटणीस यांची नुकतीच निवड करण्यात आली आहे. संस्थेच्या नव्या कार्यकारिणीत उपाध्यक्षपदी डॉ. प्रसाद नावेकर, सचिवपदी अण्णा म्हापसेकर, खजिनदारपदी जितेंद्र (जितू) मोरजकर आणि सहसचिवपदी राजू केळुसकर यांची निवड करण्यात आली.

संस्थेचे माजी अध्यक्ष ओंकार तुळसुलकर यांनी जून २०१९ मध्ये वैयक्तिक कारणास्तव स्वेच्छेने राजीनामा दिल्यानंतर रिक्त झालेल्या अध्यक्षपदाची जबाबदारी डॉ. प्रसाद नावेकर यांनी यशस्वीपणे सांभाळली. त्यानंतर आता संस्थेच्या अध्यक्षपदाची धुरा किशोर चिटणीस यांच्याकडे सोपविण्यात आली आहे.

यावेळी बोलताना श्री. चिटणीस यांनी सांगितले की, पक्षविरहित पद्धतीने सामाजिक, सांस्कृतिक, आरोग्य तसेच स्पर्धा परीक्षा अभ्यासिका यांसारख्या क्षेत्रांत कार्यरत असलेल्या अभिनव फाऊंडेशनमार्फत जनतेच्या सहकार्याने आगामी काळात विविध समाजोपयोगी उपक्रम राबविण्यात येणार आहेत. तसेच संस्थेच्या नवीन कार्यकारी मंडळाची घोषणाही लवकरच करण्यात येणार असल्याचे त्यांनी स्पष्ट केले.

विद्यार्थी चळवळीतून उभी राहिलेली अभिनव फाऊंडेशन सिंधुदुर्ग ही संस्था २००८ पासून सातत्याने सामाजिक बांधिलकी जपत विविध उपक्रम राबवत आहे. माठेवाडा येथील स्पर्धा परीक्षा अभ्यासिका, आरोग्यविषयक जनहित याचिका, ‘आठवणीतले खेळ’ हा अनोखा उपक्रम, रुग्णवाहिका उपलब्ध करून देण्याचा पुढाकार, नरेंद्र डोंगरावर वृक्षारोपण (बीजारोपण) तसेच विविध सामाजिक, शैक्षणिक, आरोग्य व सांस्कृतिक उपक्रमांमुळे संस्थेने जिल्ह्यात वेगळी ओळख निर्माण केली आहे.

नवीन पदाधिकाऱ्यांच्या नेतृत्वाखाली अभिनव फाऊंडेशनच्या समाजोपयोगी कार्याला अधिक गती मिळेल, अशी अपेक्षा व्यक्त होत आहे.