🛑 एसपी दहीकर हटेपर्यंत संघर्ष थांबणार नाही”; आमदार निलेश राणेंचा पोलिस प्रशासनावर हल्लाबोल

🛑 जिल्ह्यात गुन्हेगारी, दारू तस्करी व अंमली पदार्थांना पोलिसांची साथ असल्याचा आरोप

🎥 KOKAN LIVE BREAKING ||NEWS CHANNEL

✍ ब्युरो न्यूज : कोकण लाईव्ह ब्रेकिंग

🎴सिंधुदुर्गनगरी, दि-३०:- सिंधुदुर्ग जिल्ह्यात वाढत्या गुन्हेगारीला पोलिस प्रशासनाची साथ मिळत असल्याचा आरोप करत, पोलीस अधीक्षक मोहन दहीकर यांची हकालपट्टी होईपर्यंत संघर्ष सुरू ठेवण्याचा निर्धार आमदार निलेश राणे यांनी व्यक्त केला. जिल्ह्यातील अवैध धंदे, अंमली पदार्थांचा वाढता प्रभाव आणि दोडामार्गातील गांजा लागवडीबाबत त्यांनी पत्रकार परिषदेत गंभीर आरोप केले.

येथील आद्य पत्रकार बाळशास्त्री जांभेकर पत्रकार भवनात आयोजित पत्रकार परिषदेत ते बोलत होते. यावेळी शिवसेनेचे जिल्हाप्रमुख दत्ता सामंत, जिल्हा परिषद उपाध्यक्ष तुकाराम साईल, वित्त व बांधकाम सभापती संतोष साटविलकर, उपजिल्हाप्रमुख राजा गावडे, युवक जिल्हाप्रमुख संग्राम साळसकर, जिल्हा परिषद सदस्य केशव नारकर तसेच जिल्हा बँक संचालक संदीप परब उपस्थित होते.

राणे म्हणाले की, २२ मे २०२५ रोजी मोहन दहीकर यांनी जिल्ह्याचा कार्यभार स्वीकारल्यानंतर गुन्हेगारी नियंत्रणात आणण्यात पोलिस प्रशासन अपयशी ठरले आहे. जिल्ह्यातील दारू तस्करी, अंमली पदार्थांचा पुरवठा, गो-तस्करी आणि इतर अवैध धंद्यांवर प्रभावी कारवाई होत नसल्याचा आरोप त्यांनी केला. त्यामुळे संबंधित अधिकाऱ्यांवर जबाबदारी निश्चित करून पोलीस अधीक्षकांची बदली अथवा हकालपट्टी करण्यात यावी, अशी मागणी आपण पालकमंत्री आणि मुख्यमंत्री देवेंद्र फडणवीस यांच्याकडे करणार असल्याचे त्यांनी सांगितले.

गोवा बनावटीच्या दारूची तस्करी हा सिंधुदुर्ग जिल्ह्यासमोरील गंभीर प्रश्न बनला असून गोव्यातून मोठ्या प्रमाणावर दारूची वाहतूक होत असल्याचा दावा त्यांनी केला. मात्र या विरोधात प्रभावी कारवाई होत नसल्याने तस्करांचे मनोबल वाढत असल्याचे ते म्हणाले. जी कारवाई होते ती बहुतांश वेळा रत्नागिरी जिल्ह्यातील राजापूर परिसरात होत असल्याचे त्यांनी नमूद केले.

दोडामार्गात रबर लागवडीच्या आड गांजा शेतीचा आरोप

अंमली पदार्थांच्या प्रश्नावर बोलताना आमदार निलेश राणे यांनी दोडामार्ग तालुक्यात रबर लागवडीच्या नावाखाली मोठ्या प्रमाणात गांजाची लागवड होत असल्याचा गंभीर आरोप केला. तालुक्यात सुमारे १८०० हेक्टर क्षेत्र रबर लागवडीखाली असून अनेक भागांमध्ये स्थानिकांनाही सहज प्रवेश मिळत नसल्याचे त्यांनी सांगितले. या पार्श्वभूमीवर पोलिस प्रशासनाने विशेष मोहीम राबवून सखोल तपास करावा आणि गांजा लागवडीमागील सूत्रधारांचा शोध घ्यावा, अशी मागणी त्यांनी केली. तसेच अंमली पदार्थांच्या कारवाईत केवळ किरकोळ आरोपींना पकडण्याऐवजी मुख्य पुरवठादारांपर्यंत पोहोचण्याची गरज असल्याचेही त्यांनी नमूद केले.

जिल्ह्यातील बेकायदा गोमांस विक्री, गो-तस्करी तसेच ध्वनिक्षेपकांच्या नियमभंगाच्या तक्रारींकडेही पोलिसांकडून दुर्लक्ष होत असल्याचा आरोप राणे यांनी केला. स्थानिक गुन्हे अन्वेषण शाखेतील काही अधिकाऱ्यांवर थेट आरोप करत, अवैध धंद्यांमधून कथित हप्ते गोळा करण्याचे काम काही अधिकारी करत असल्याचा दावा त्यांनी केला.

“जोपर्यंत पोलीस अधीक्षक मोहन दहीकर यांची जिल्ह्यातून बदली होत नाही, तोपर्यंत मी स्वस्थ बसणार नाही. पोलिस प्रशासनातील गैरप्रकारांविरोधातील माझे ‘स्टिंग ऑपरेशन’ यापुढेही सुरू राहील,” असा इशाराही राणे यांनी यावेळी दिला.