जठारांच्या आगमनाने भाजपमध्ये नवे चैतन्य; विशाल परब यांचे तोंडभरून कौतुक
जठारांच्या आगमनाने भाजपमध्ये नवे चैतन्य; विशाल परब यांचे तोंडभरून कौतुक
जनसंपर्क कार्यालयाच्या उद्घाटनानंतर भाजपला यशाची मालिका; मतदारसंघातील प्रलंबित कामांसाठी आमदार निधीतून सहकार्याची मागणी
सावंतवाडी : भारतीय जनता पार्टीचे नवनियुक्त आमदार प्रमोद जठार यांचे सावंतवाडीत आगमन होताच भाजपचे युवा नेते विशाल परब यांनी त्यांचे जंगी स्वागत केले. यावेळी आयोजित कार्यक्रमात बोलताना विशाल परब यांनी आमदार जठार यांच्या नेतृत्वाचे आणि त्यांच्या मार्गदर्शनाचे तोंडभरून कौतुक केले. जठार साहेबांच्या आगमनाने कार्यकर्त्यांमध्ये नवे चैतन्य आणि ऊर्जा संचारली असल्याचे त्यांनी नमूद केले.
विशाल परब पुढे म्हणाले की, प्रमोद जठार यांचा पायगुण भाजपसाठी अत्यंत शुभ ठरला आहे. सावंतवाडी येथील जनसंपर्क कार्यालयाचे उद्घाटन झाल्यानंतर लागलेल्या नगरपालिका निवडणुकीत भाजपला मोठे यश मिळाले. केवळ नगरपालिकाच नव्हे, तर जिल्हा परिषद, पंचायत समिती आणि ग्रामपंचायत निवडणुकांमध्येही संपूर्ण वातावरण भाजपमय झाले असल्याचे त्यांनी सांगितले. या यशाचे श्रेय जठार यांच्या सकारात्मक प्रभावाला जात असल्याचे मतही त्यांनी व्यक्त केले.
यावेळी परब यांनी सावंतवाडी विधानसभा मतदारसंघातील विकासकामांकडे लक्ष वेधले. मतदारसंघातील ज्या भागांमध्ये अद्याप विविध अडचणी प्रलंबित आहेत, त्या ठिकाणी आमदार निधीतून सहकार्य मिळावे, अशी विनंती त्यांनी जठार यांच्याकडे केली. साहेबांच्या माध्यमातून मतदारसंघातील प्रश्न मार्गी लागतील, असा विश्वासही त्यांनी व्यक्त केला.
या कार्यक्रमाला भाजपचे अनेक पदाधिकारी, कार्यकर्ते आणि समर्थक मोठ्या संख्येने उपस्थित होते.