जनतेच्या विश्वासाला न्याय देणार – विक्रांत सावंत यांचा निर्धार
जनतेच्या विश्वासाला न्याय देणार – विक्रांत सावंत यांचा निर्धार
सावंतवाडी | प्रतिनिधी
“माझ्या पदाचा उपयोग हा जनसामान्यांच्या कल्याणासाठीच होईल,” असा ठाम विश्वास व्यक्त करत जिल्हा परिषद सदस्य विक्रांत सावंत यांनी आपल्या कार्याची दिशा स्पष्ट केली. सावंतवाडी येथे शिक्षण प्रसारक मंडळाच्या वतीने आयोजित भव्य सत्कार समारंभात ते बोलत होते.
जिल्हा परिषद निवडणूक २०२६ मध्ये माजगाव मतदारसंघातून विक्रमी मताधिक्याने विजय मिळवत शिक्षण व कृषी समिती सदस्य म्हणून निवड झाल्याबद्दल त्यांचा गौरव करण्यात आला. राणी पार्वती देवी हायस्कूल व ज्युनिअर कॉलेजच्या सभागृहात हा कार्यक्रम उत्साहात पार पडला.यावेळी बोलताना सावंत म्हणाले, “तुमचं आमच्या कुटुंबावर असलेलं प्रेम पाहून मी भारावून गेलो आहे. हा विजय माझा नसून जनतेचा आहे. ज्येष्ठांचे आशीर्वाद, मतदारांचे प्रेम आणि कुटुंबाची पुण्याई यामुळेच हा सन्मान मिळाला. या विश्वासाला तडा जाऊ देणार नाही.”
*राजकीय पुढारपणाची चिन्हे स्पष्ट*
कार्यक्रमात माजी नगराध्यक्ष बबन साळगावकर यांनी विक्रांत सावंत यांच्या कार्यपद्धतीवर विश्वास व्यक्त करत, “अजित पवार यांच्या धडाकेबाज कामशैलीप्रमाणे जनतेसाठी काम करावे. पुढील निवडणुकीत प्रचाराची गरज भासणार नाही इतके प्रभावी काम व्हावे,” अशी अपेक्षा व्यक्त केली. तसेच त्यांनी भविष्यात जिल्हा परिषद अध्यक्षपदापर्यंत मजल मारण्याच्या शुभेच्छाही दिल्या.
शिवसेना जिल्हाप्रमुख संजू परब यांनीही सावंत यांच्या नेतृत्वगुणांचे कौतुक करत, “त्यांचा स्वभाव आणि समाजाविषयी असलेली बांधिलकी पाहता त्यांची प्रगती निश्चित आहे. त्यांनी मोठी स्वप्ने पाहावीत,” असा सल्ला दिला.
*शिक्षण क्षेत्रातूनही पाठिंबा*
कार्यक्रमात शिक्षण प्रसारक मंडळाचे पदाधिकारी, प्राध्यापक व शिक्षकांनीही सावंत यांच्या कार्याला शुभेच्छा दिल्या. विविध मान्यवरांच्या उपस्थितीत झालेल्या या सत्कार सोहळ्याने सावंत यांच्या राजकीय प्रवासाला नवी उंची मिळाल्याचे चित्र दिसून आले.
विक्रांत सावंत यांचा विजय हा केवळ राजकीय यश नसून, जनतेच्या अपेक्षांचा मोठा भार आहे. त्या अपेक्षांना न्याय देत त्यांनी जर विकासाच्या दिशेने ठोस पावले उचलली, तर सावंतवाडीच्या राजकारणात एक नवा अध्याय लिहिला जाऊ शकतो.